ચેઈન સ્નેચિંગના કેસમાં ત્રણ બેરોજગાર યુવકો સહિત ચારની ધરપકડ

સુરતઃ ક્રાઈમ બ્રાંચે શહેરમાં ચેઈન સ્નેચિંગના આઠ કેસમાં કથિત રીતે સંડોવાયેલા ચાર શખ્સોની ગુરુવારે ધરપકડ કરી હતી. પોલીસે શખ્સોની ધરપકડ ત્યારે કરી જ્યારે તેઓ ચોરેલી સોનાની ચેઈનને ઝવેરી પાસે વેચવા માટે ગયા હતા. ઝવેરી નિયમિત રીતે શખ્સો પાસેથી ચોરેલી ચોનાની ચેઈન ખરીદતો હતો.

પોલીસે કૈલાસ નગરમાં રહેતા અમિત મહેતા નામના 54 વર્ષીય ઝવેરીની ધરપકડ કરી છે, જે આરોપી મોહિત પટેલ (21), અક્ષય ઉર્ફે કાળુ ઉત્તપુરે (20) અને કરણ તીરમળે (20) પાસેથી ચેઈન ખરીદતો હતો. પોલીસે 106.92 ગ્રામ વજન ધરાવતી અને 4.45 લાખ રૂપિયાની કિંમતની નવ સોનાની ચેઈન જપ્ત કરી છે. આ સિવાય તેમણે બાઈક અને ચાર મોબાઈલ ફોન પણ કબ્જે કર્યા છે. ગેંગ સામે ઉમરા પોલીસ સ્ટેશનમાં પાંચ, ખટોદરા પોલીસ સ્ટેશનમાં બે અને રાંદેર પોલીસ સ્ટેશનમાં બે કેસ નોંધવામાં આવ્યા છે, તેમ પોલીસે જણાવ્યું હતું.

બેરોજગાર યુવાનોની મુલાકાત જેલમાં થઈ હતી અને તેઓ મિત્રો બની ગયા હતા. તેઓ પૈસાનો ઉપયોગ નવા મોબાઈલ ફોન અને કપડાં ખરીદવા માટે કરતા હતા. મોહિત પટેલ શહેરના જુદા-જુદા વિસ્તારોમાંથી નવ ચેઈન સ્નેચિંગ અને લૂંટના ગુનામાં ઝડપાયો હતો. જ્યારે કાળુ ઉત્તપુરેની 6 સ્નેચિંગ અને લૂંટના કેસમાં ધરપકડ થઈ હતી. કરણ તીરમળે ચોરી અને હુમલો કરવા બદલ ઝડપાયો હતો, તેમ પોલીસે કહ્યું હતું.

'2020માં શહેરમાં ચેઈન સ્નેચિંગના 32 કેસ નોંધાયા હતા, જેમાંથી 28 પહેલાથી જ મળી આવી હતી. નાગરિકો નિર્ભયતાથી રોડ પર ફરી શકે તેવું પોલીસ સુનિશ્ચિત કરી રહી છે', તેમ શહેર પોલીસ કમિશનર અજય તોમરે કહ્યું હતું.