સુરતઃ મોબાઈલ અને ટીવી જોવાનું બંધ કરાવી દેવાતા કિશોરીએ કરી લીધી આત્મહત્યા

સુરતઃ કતારગામ વિસ્તારમાં રહેતી 16 વર્ષની યુવતીને માથામાં દુખાવો થતો હતો. સારવાર દરમિયાન ડોક્ટરોએ તેને ટીવી અને મોબાઈલ ફોન તેમજ ઓનલાઈન અભ્યાસ ન કરવાની સલાહ આપી હતી. યુવતી ડિપ્રેશનમાં આવી ગઈ અને પોતાના ઘરે જ ફાંસો ખાઈ આપઘાત કરી લીધો.

ધોરણ 10માં અભ્યાસ કરતી આ યુવતી કોરોનાને કારણે ઓનલાઈન અભ્યાસ કરતી હતી. છેલ્લા ઘણા દિવસથી તેના માથામાં દુખાવો હતો અને તેને શરદી પણ હતી. પરિવારજનો તેને સારવાર માટે હોસ્પિટલ લઈ ગયા. જ્યાં તબીબોએ તેને વધારે સમય મોબાઈલ ફોન અને ટીવી નહીં જોવાની સલાહ આપી.

તબીબોની સલાહ મુજબ તેને ઓનલાઈન અભ્યાસ કરવાની પણ ના પાડવામાં આવી હતી. થોડા દિવસ દવા લીધા બાદ આજે સાંજે અચાનક જ યુવતીએ પોતાના રૂમનો દરવાજો બંધ કરીને ફાંસો ખાઈ આપઘાત કરી લીધો. પરિવાજનોએ દરવાજો ખખડાવ્યો પરંતુ તેણે ઉઘાડ્યો નહીં એટલે તેમની ચિંતા વધી ગઈ. તેમણે દરવાજો તોડીને જોયું તો તેણે આ દુનિયા છોડી દીધી હતી. આ અંગે પોલીસે અકસ્માત મોતની નોંધ કરી વધુ તપાસ હાથ ધરી છે.