કેનેડાથી આવેલી દીકરીને લેવા ગયેલા પિતા-પુત્રનું અકસ્માતમાં મોત, યુવતી બચી ગઈ

સુરત: ગુજરાત અને મહારાષ્ટ્ર બોર્ડર પર ચારોટી પાસે ટેન્કર સાથેની ધડાકાભેર ટક્કરમાં પિતા-પુત્રનું મોત નીપજ્યું હતું. મીડિયા રિપોર્ટ મુજબ પીપળોદમાં રહેતા રાજીવ પાજીયવાળા (ઉંમર 52 વર્ષ) પુત્ર હર્ષલ (ઉંમર-20 વર્ષ) સાથે કેનેડાથી આવેલી દીકરીને લેવા મુંબઈ ગયા હતા. જોકે, ત્યાથી પરત આવતી વખતે રસ્તામાં આગળ ચાલી રહેલા ટેન્કરનું ટાયર ફાટી જવાથી તેમની કાર ધડાકાભેર અથડાઈ હતી. જેમાં દીકરી નિધિ અને ડ્રાઈવરનો ચમત્કારિક બચાવ થયો હતો. જ્યારે પિતા-પુત્રનું મોત નીપજ્યું હતું. બંનેના મોતથી પરિવાર અને ગામમાં શોકનો માહોલ જોવા મળી રહ્યો છે.

ટેન્કર સાથેના અકસ્માતમાં પિતા-પુત્રનું મોત
મીડિયા રિપોર્ટ મુજબ રાજીવભાઈ અને હર્ષલ મુંબઈ જતા પહેલા વાપીમાં તેમના સિસ્ટરને ત્યાં ગયા હતા. જોકે, નિધિ પહોંચવાની હોવાથી તેઓ ત્યાંથી કેબ કરાવીને મુંબઈ ગયા હતા. નિધિને લઈને રાત્રે 2 વાગ્યાની આસપાસ પરત ફરી રહ્યા હતા ત્યારે ચારોટી પાસે સવાર પાંચેક વાગ્યે કાર સાથે અકસ્માત સર્જાયો હતો. ડ્રાઈવરે પોલીસને જણાવ્યાનુસાર આગળ ટેન્કર ચાલતું હતું અને અચાનક ટાયર ફાટી ગયું જેથી સ્ટેયરિંગ કંટ્રોલમાં ન રહેતા અકસ્માત સર્જાયો હતો. જેમાં પિતા-પુત્રનું મોત નીપજ્યું હતું જ્યારે કેબના ડ્રાઈવર અને નિધિને સામાન્ય ઈજાઓ થઈ હતી.

કેનેડાથી આવેલી પુત્રીને લઈને ઘરે આવતા અકસ્માત નડ્યો
મળતી માહિતી પ્રમાણે પીપળોદમાં તિરુપતિનગરમાં રહેતા રાજીવ પાજીયાવાળા સિવિલ એન્જિનિયરિંગ સાથે બિલ્ડર પણ હતા. જ્યારે તેમનો પુત્ર હર્ષલે હાલમાં જ બીએસસી આઈટી પૂર્ણ કર્યું હતું. રાજીવભાઈની દીકરી નિધિ કેનેડામાં અભ્યાસ કરતી હતી અને ચાર વર્ષથી ત્યાં સ્થાયી થઈ હતી. જો કે, નિધિનું ત્રણ મહિના માટે ઈન્ડિયા આવવાનું થતાં પિતા-પુત્ર કેબ કરીને તેને રિસીવ કરવા ગયા હતા. રસ્તામાં અકસ્માતમાં બંનેના મોત થતાં 3 મહિના માટે આવેલી નિધિ અને ભાઈ સાથે ગણતરીના કલાકો જ રહી શકી હતી.