લગ્નમાં સોશિયલ ડિસ્ટન્સના ભંગ બદલ સુરત મ્યુનિસિપલે ઉઘરાવ્યો ₹5000નો 'ચાંદલો', પહોંચ વાઈરલ

સુરતઃ કોરોના મહામારી વચ્ચે સરકારના વારંવાર બદલાતા નિયમોને કારણે લગ્ન પ્રસંગ કરનારા લોકોને ભારે મુશ્કેલી પડી રહી છે. લગ્નમાં 200 લોકોની હાજરીને ઘટાડીને 100 કરી દેવામાં આવી છે. આ ઉપરાંત લગ્ન પ્રસંગમાં કોવિડ-19ની ગાઈડલાઈનનું પાલન કરવાની શરતે પ્રસંગની છૂટ આપવામાં આવી રહી છે. આ વચ્ચે સોશિયલ મીડિયામાં સુરત મ્યુનિસિપલ કોર્પોરેશન(SMC)ની એક પહોંચ વાઈરલ થઈ છે. લગ્ન પ્રસંગમાં મહેમાનો સોશિયલ ડિસ્ટન્સિંગ અને માસ્ક વગર હોવાથી ₹5000નો દંડ ફટકારવામાં આવ્યો છે.

SMCની વાઈરલ થયેલી પહોંચમાં પૂર્વઝોન-13માં રાહુલભાઈ દુલાભાઈ જીવાણી નામના વ્યક્તિનો ઉલ્લેખ છે. જેની પાસેથી 5000 રૂપિયાનો દંડ વસૂલ કરી તેમના નામે આ પહોંચ આપવામાં આવી છે. આ પહોંચ 25 નવેમ્બર 2020ના રોજની છે. આ સાથે તેમાં કન્યાનું નામ અને ગંગાજમના સોસાયટીની વાડીમાં લગ્ન પ્રસંગ દરમિયાન સોશિયલ ડિસ્ટન્સિંગ અને માસ્ક વગર મહેમાનો હોવાથી આ દંડ ફટકાર્યો હોવાનો પણ ઉલ્લેખ છે.


સોશિયલ મીડિયામાં આ પહોંચ ખૂબ જ વાઈરલ થઈ છે. જેના પર યૂઝર્સ ગુસ્સો ઠાલવી રહ્યા છે. એક યૂઝર્સે કોમેન્ટ કરી કે નેતાઓની રેલી અને સરઘસમાં છૂટ આપવામાં આવે છે અને સામાન્ય જનતાઓને આ રીતે લૂંટવામાં આવે છે. હાલ કોરોની સ્થિતિ જોઈને લગ્નનું આયોજન કરનારા લોકો ચિંતિત છે.