સુરતઃ ફેશન ડિઝાઈનિંગના વિદ્યાર્થીઓએ 'કોરોના ફ્રી' ચણિયાચોળી અને કેડિયા તૈયાર કર્યા

કોરોના વાયરસની મહામારીના કારણે આ વર્ષે રાજ્યભરમાં ગરબા રમવાની મંજૂરી આપવામાં નથી આવી. સરકાર દ્વારા જાહેર અને શેરી બંને ગરબા પર પ્રતિબંધ મૂકવામાં આવ્યો છે. જેના કારણે ખેલૈયાઓ પણ નિરાશ થઈ ગયા છે. ત્યારે સુરતના ફેશન ડિઝાઈનિંગના વિદ્યાર્થીઓએ પીપીઈ ફેબ્રિકમાંથી ચણિયાચોળી અને કેડીયા તૈયાર કરીને સૌ કોઈને ચોંકાવી દીધા છે.

સુરતની IDT ફેશન ડિઝાઈનિંગ ઈન્સ્ટીટ્યુટમાં અભ્યાસ કરતા વિદ્યાર્થીઓએ કોરોનાની મહામારીને જોતા પીપીઈ ફેબ્રિક પર આભલા, ભરતકામ તથા પેઈન્ટિંગ કરીને કોરોના ફ્રી ચણિયાચોળી અને કેડીયા તૈયાર કર્યા હતા. આટલું જ નહીં વિદ્યાર્થીઓએ સાદા માસ્ક પર પણ ભરતામ અને આભલા લગાવીને તેને નવરાત્રી સ્પેશિયલ માસ્ક બનાવી દીધા હતા. આ કોરોના ફ્રી ચણિયાચોળી અને કેડીયાએ સૌ કોઈનું ધ્યાન આકર્ષિત કર્યું હતું.


ઉલ્લેખનીય છે કે રાજ્ય સરકારે કોરોનાની સ્થિતિને જોતા નવરાત્રી, દશેરા, દિવાળી તથા શરદપૂનમ અને દુર્ગા પૂજાની ઉજવણીને લઈને ઘણી બધી ગાઈડલાઈન્સ બહાર પાડી હતી. જે મુજબ, આ વર્ષે નવરાત્રીમાં માત્ર માતાજીની ગરબી કે મૂર્તિની જ પૂજા-આરતી કરવાની મંજૂરી આપવામાં આવી છે. આ સમગ્ર કાર્યક્રમ માટે માત્ર 1 કલાકની મંજૂરી અપાઈ છે અને તેના માટે સોસાયટીઓમાં પહેલાથી પોલીસની પણ મંજૂરી લેવાની રહેશે. રાજ્યના મોટાભાગના ગરબાના આયોજનો આ વર્ષે બંધ રાખવામાં આવ્યા છે. એવામાં સુરતના ફેશન ઈન્સ્ટીટ્યુટ દ્વારા ખાસ પ્રકારની ચણિયાચોળી તૈયાર કરાયેલી જોઈને લોકો પણ ચોંકી ઉઠ્યા હતા.