સુરતમાં ગોલ્ડ લોન કૌભાંડ: દાગીનામાં ઉપર જ સોનું, અંદર ગોલમાલ

યજ્ઞેશ મહેતા, સુરત: ગોલ્ડ લોન કૌભાંડ મામલે તપાસ દરમિયાન બહાર આવ્યું છે કે, લોન મેળવવા માટે જે દાગીના ગીરવે મૂકાયા હતા તેમાં માત્ર 40 ટકા જ સોનું હતું અને બાકી કોઈ અન્ય ધાતુનો ઉપયોગ કરવામાં આવ્યો હતો. પોલીસે જણાવ્યું કે, નકલી દાગીના તૈયાર કરવા માટે કોઈ ખાસ પદ્ધતિનો ઉપયોગ કરાયો હશે કારણકે બેંકના વેલ્યૂઅર પણ અસલી-નકલીમાં ફરક ના કરી શક્યા.

નકલી ગોલ્ડ જ્વેલરીને ગીરવે મૂકીને કુલ 22 લોકોએ ICICI બેંકની વિવિધ બ્રાન્ચમાંથી 2.55 કરોડની રકમની 41 લોન લીધી હતી. આ તમામ સામે ઓક્ટોબર મહિનામાં ગુનો દાખલ કરવામાં આવ્યો છે. અત્યાર સુધીમાં 8 શખ્સોની ધરપરડ કરવામાં આવી છે, તેમ તપાસ કરી રહેલા ક્રાઈમ બ્રાંચના અધિકારીએ જણાવ્યું છે. મોટાભાગની ગોલ્ડ લોન આ વર્ષે ઓગસ્ટથી ઓક્ટોબર મહિના દરમિયાન લેવામાં આવી છે.

પોલીસે જણાવ્યું, "નકલી દાગીનામાં 40 ટકાથી પણ ઓછું સોનું હતું. એ વખતે પણ તે પકડી પાડવું મુશ્કેલ હતું." જ્યારે લોન માટે અરજી કરનારા એક વ્યક્તિની ગોલ્ડ જ્વેલરી નકલી હોવાનું માલૂમ પડ્યું ત્યારે ગીરવે મૂકાયેલા બાકીના સોનાના દાગીનાની પણ તપાસ કરાઈ હતી. જે બાદ આ સમગ્ર કૌભાંડનો પર્દાફાશ થયો હતો.

પોલીસકર્મીએ જણાવ્યું, "દાગીના ઉપર સોનું ચઢાવાયેલું હતું પરંતુ અંદર કોઈ બીજી જ ધાતુનો ઉપયોગ કરવામાં આવ્યો હતો. અંદર બીજી ધાતુનો ઉપયોગ થયો છે તે જાણવા માટે દાગીના કાપવા જરૂરી હતા. પરંતુ દાગીના કાપવાથી લોનના નિયમોનો ભંગ થતો હતો કારણકે આ ઘરેણાં ગીરવે મૂકાયા હતા નહીં કે વેચવામાં આવ્યા હતા."

"ઉત્પાદક પાસેથી દાગીના મેળવ્યા પછી 22 આરોપીઓમાંથી એકે તે ગીરવે મૂક્યા હતા. એક આરોપી સફળ રહેતા બાકીના પણ મેદાનમાં ઉતર્યા હતા", તેમ સુરત ક્રાઈમ બ્રાંચના અધિકારીએ જણાવ્યું. સોનાના નકલી દાગીના બનાવનાર વ્યક્તિએ જ આ તમામ આરોપીઓને આ ઘરેણાં પૂરા પાડ્યા હશે તેવું અનુમાન છે. જો કે, હાલ તો આ ઘરેણાં બનાવનાર પોલીસ પકડથી દૂર છે.