સુરત: કસરત કરાવવાના બહાને જિમના ટ્રેઈનરે છોકરીની કરી શારીરિક છેડતી

સુરત: કોરોનાની મહામારીમાં રોગપ્રતિકારક શક્તિ વધે અને ફિટનેસ જળવાઈ રહે તે માટે ઘણાં લોકો જિમમાં કસરત કરવા તરફ વળ્યા છે. ત્યારે, સુરતના વરાછા વિસ્તારમાં આવેલા એક જિમના ટ્રેઈનરે કસરત શીખવાડવાના બહાને એક છોકરીની છેડતી કરી હોવાનું જાણવા મળ્યું છે. છેડતીની આ ઘટના બાદ તે છોકરીએ જીમ ટ્રેઈનર વિરુદ્ધ પોલીસ ફરિયાદ નોંધાવતા સમગ્ર મામલો બહાર આવ્યો છે. સુરતના મોટા વરાછા વિસ્તારમાં આવેલા એક જિમમાં જતી છોકરીની જિમ ટ્રેઈનરે છેડતી કરી હોવાની ફરિયાદ પોલીસ સ્ટેશનમાં નોંધાવવામાં આવી છે.

પ્રાપ્ત માહિતી મુજબ, સુરતના મોટા વરાછા ખાતે આવેલા એક જિમમાં કસરત કરવા જતી 14 વર્ષની સગીરાની જિમ ટ્રેઈનરે શારીરિક છેડતી કરતા તેણે જિમ ટ્રેઈનર વિરુદ્ધ પોલીસ ફરિયાદ નોંધાવતા પોલીસે આ મામલે ગુનો નોંધીને વધુ તપાસ શરૂ કરી છે. આ છોકરી તે જિમમાં છેલ્લા 2 વર્ષથી કસરત કરવા માટે જતી હતી. ત્યારે ત્યાં હાજર એક ટ્રેઈનર કસરત કરાવવાના બહાને તેની સાથે શારીરિક છેડતી કરતો હતો.

વધુ મળતી માહિતી મુજબ, જિમમાં કસરત કરવા માટે આવતી 14 વર્ષની સગીરા પર જિમના ટ્રેઈનરની દાનત બગડી હતી અને તે કસરત કરાવવાના બહાને તેની સાથે શારીરિક છેડતી કરતો હતો. પણ, હદ તો ત્યારે થઈ ગઈ કે જ્યારે આ જિમ ટ્રેઈનરે આ સગીરાને વારંવાર ફોન કરીને તેને માનસિક ત્રાસ આપવાનું શરૂ કરી દીધું. જિમ ટ્રેઈનરના આ વર્તનથી ડરી ગયેલી છોકરીએ તેના પિતાને આ વિશેની જાણ કરી. પરિવારના સપોર્ટથી આ સગીરાએ તે જિમ ટ્રેઈનર વિરુદ્ધ પોલીસમાં ફરિયાદ નોંધાવી હતી. પોલીસે આ સગીરાની ફરિયાદના આધારે ગુનો નોંધીને જિમ ટ્રેઈનરને ઝડપી લેવાની તજવીજ હાથધરી છે.