હાર્દિકને છાતીમાં દુ:ખાવો, જેલમાં અપાઈ સારવાર

નવગુજરાતસમય.કોમ

હાર્દિક પટેલ 15મી જુલાઈએ જેલમાંથી મુક્ત થવાનો છે ત્યારે આજે તેને સવારના સમયે છાતીમાં દુ:ખાવો ઉપડતા તેને જેલમાં સારવાર આપવામાં આવી હતી.

ટીવી રિપોર્ટ્સ અનુસાર, સુરતની લાજપોર જેલમાં બંધ હાર્દિકની તબિયત આજે સવારે લથડી હતી. તેને આજે એક કેસમાં કોર્ટમાં પણ હાજર કરવાનો હતો, પરંતુ લાજપોર સેન્ટ્રલ જેલના ડીવાયએસપી વી.ડી. પાટીલે કોર્ટને કહ્યું હતું કે હાર્દિકની તબિયત નાદુરસ્ત હોવાથી તેને કોર્ટમાં હાજર નથી કરી શકાયો. બીજી તરફ, આજે મહેશ સવાણી, મુકેશ પટેલ, દિનેશ નાવડિયા તેમજ કાનજી ભાલાળાએ હાર્દિકની જેલમાં મુલાકાત લીધી હતી.




હાર્દિકને ગુજરાત હાઈકોર્ટ રાજદ્રોહ અને વીસનગરમાં એમએલએની ઓફિસમાં તોડફોડ કરવાના કેસમાં જામીન આપી ચૂકી છે. કાયદાકીય પ્રક્રિયા પૂર્ણ થયા બાદ 15મી જુલાઈએ તે જેલમાંથી બહાર આવી જશે. હાર્દિક નવ મહિના જેટલા લાંબા સમયગાળા બાદ જેલમાંથી બહાર આવી રહ્યો છે ત્યારે સુરતમાં ઠેર-ઠેર તેના સ્વાગતની તૈયારીઓ ચાલી રહી છે તેમજ પાટીદારોનું વર્ચસ્વ ધરાવતા વિસ્તારમાં હાર્દિકના સમર્થનમાં પોસ્ટર્સ પણ લગાવવામાં આવ્યા છે.

હાર્દિકને જેલમાંથી બહાર આવવામાં હવે ગણતરીનો સમય બાકી છે ત્યારે ગઈ કાલે તેનો એક લેટર પણ બહાર આવ્યો હતો જેમાં તેણે જણાવ્યું હતું કે, તેની મુક્તિમાં અમિત શાહનો કોઈ હાથ નથી તેમજ પોતે તેમને ક્યારેય મળ્યો પણ નથી.