કોઈ ના કરે તે સુરતી કરે! ઉત્તરાયણ પહેલા માર્કેટમાં આવી ગઈ ઈમ્યુનિટી બૂસ્ટર ચીકી

કોરોનાકાળમાં પોતાને ચુસ્ત અને તંદુરસ્ત રાખવા માટે ગુજરાતીઓ અવનવા અખતરા કરતા જોવા મળી રહ્યા છે. અત્યાર સુધીમાં તમે માર્કેટમાં ઇમ્યુનિટી બૂસ્ટર ખાખરા તો જોયા જ હશે. હવે સુરતમાં ઉત્તરાયણમાં ખવાતી વાનગીઓમાં ઇમ્યુનિટી ચીકીનો ઉમેરો થયો છે. સુરતમાં ઇમ્યુનિટી બુસ્ટરનો એક અલગ જ ટ્રેન્ડ શરૂ થયો છે. તલ અને સિંગની ચીકી સાથે એક બે નહીં પરંતુ 17થી વધુ જાતની વસ્તુઓનું વેચાણ શરૂ થયું છે.

સુરતમાં જ પોતાના દાદાના સમયથી ચીકીનો વ્યવસાય કરતા દીપા વાંકાવાલાએ એક સ્થાનિક મીડિયાને જણાવ્યું હતું કે, ઉતરાણ પહેલાની ખાવાની વાનગી એટલે ચીકી. હાલમાં ગત વર્ષની સરખામણીમાં કોરોનાને કારણે ચીકી ધંધામાં ઘટાડો જોવા મળી રહ્યો છે. પરંતુ કોરોનાને કારણે લોકો ઇમ્યુનિટી બુસ્ટર તરફ વળી રહ્યા હોવાથી ઇમ્યુનિટી બૂસ્ટર ચીકી બનાવવાનું શરૂ કર્યું છે.

કાળા અને સફેદ તલમાં ભરપૂર શક્તિ રહેલી હોય છે, તેની સાથે ગોળથી શરીરમાં રોગપ્રતિકારક શક્તિ વધે છે. એવામાં કાળા અને સફેદ તલની ચીકીની વધુ ડિમાન્ડ માર્કેટમાં છે. આ ઉપરાંત ડ્રાયફ્રુટ પણ શરીર માટે સારા હોવાથી ડ્રાય ફુટની ચીકી, દાણા કે દાળિયા ચાવવા ગમતા નથી, તેથી ક્રશ કરેલા દાણાની માવા ચીકી, ઇમ્યુનિટી બુસ્ટર ચીકી ઉપરાંત ઉતરાયણમાં પરંપરાગત રીતે ખાવાતી સીંગદાણા અને દાળિયાની ચીકી પણ તૈયાર કરાઈ છે.

ઉત્તરાયણ પર લોકો મોટી સંખ્યામાં ચીકી હોંશે હોંશે આરોગતા હોય છે. એવામાં ચીકીમાં પણ ઈમ્યુનિટી બૂસ્ટર ચીજોને મિક્સ કરીને બનાવવાથી માર્કેટમાં તેને ધૂમ મચી છે. ઉલ્લેખનીય છે કે ઉત્તરાયણ પર તલ ઉપરાંક મમરાની સાથે રાજગરાના લાડુ પણ લોકો આરોગતા હોય છે. એવામાં ગ્રાહકોને આકર્ષવા માટે વેપારીઓ માર્કેટમાં અવનવી ચીજો રજૂ કરી રહ્યા છે.