સુરતના કતારગામમાં એક સિલિન્ડરમાં બેથી અઢી કિલો ગેસની ગોલમાલ પકડાઈ

સુરતઃ પોતાની કમાણીમાં અને આવકમાં વધારો કરવા માટે ગ્રાહકોને છેતરવાના કિસ્સા અનેકવાર સામે આવતા હોય છે. આ જ રીતે હવે સુરતમાં ગેસના વધતા ભાવની સાથે ગ્રાહકોને વજનમાં ઓછો ગેસ આપીને છેતરવાનો કિસ્સો સામે આવ્યો છે, આ રીતે ગ્રાહકો સાથે છેતરપિંડી કરતી એજન્સી સામે પગલા પણ ભરવામાં આવી રહ્યા છે. (પ્રતિકાત્મક તસવીર)

શહેરના કતારગામ વિસ્તારમાં આવેલી ગેસ એજન્સીના ત્યાંથી ગ્રાહકોના ઘરે રાંધણ ગેસના સિલિન્ડર સપ્લાય કરવામાં આવે છે. અહીં ગ્રાહકો દ્વારા બાટલામાં ગેસ ઓછો આવતો હોવાની ફરિયાદો ઉઠતા તપાસ કરવામાં આવી જેમાં ચોંકાવનારો ખુલાસો થયો છે.

ગ્રાહકોની ફરિયાદો મળતા આમ આદમી પાર્ટીના કાર્યકર્તાઓ દ્વારા તપાસ કરવામાં આવી તો દરેક બાટલામાં નક્કી વજન કરતા ઓછો ગેસ હોવાનું માલુમ પડ્યું હતું. જેમાં કોઈ ગેસના બાટલાનું કુલ વજન 27.50 કિલો તો કોઈનું 28 કિલો વજન થયું હતું. સામાન્ય રીતે 14.2 કિલો ગેસ સાથે બાટલાનું કુલ વજન 30 કિલો થતું હોય છે. આવામાં તપાસ દરમિયાન ગ્રાહકો સાથે છેતરપિંડી થવાનું માલુમ પડ્યું હતું.

ગેસના બાટલામાં ઓછો ગેસ ભરીને ગ્રાહકો સાથે થતી છેતરપિંડીની આમ આદમી પાર્ટીના કાર્યકર્તાઓની તપાસ અંગે યોગેશ જાધવાણીએ જણાવ્યું કે, આ અંગે કતારગામ મામલતદાર અને સંબંધિત વિભાગમાં ફરિયાદ કરવામાં આવી છે. પરંતુ કોઈ જવાબ ના મળતા બે ટેમ્પોને કતારગામ પોલીસ સ્ટેશન મૂકવામાં આવ્યા છે. તેમણે જણાવ્યું કે સોમવારે જિલ્લા કલેક્ટર, પુરવઠા અધિકારીઓને બનાવ અંગે જાણ કરીને તપાસની માગણી કરીશું.