બ્રાન્ડેડ ઘી ખરીદતા પહેલા તેને બે વાર ચેક કરજો, આ ફોટા જોઈ આખો ખેલ સમજાઈ જશે

સુરત: તમે જે બ્રાન્ડેડ કંપનીનું ઘી લઈ રહ્યા છો તે જરુરી નથી કે ઓરિજિનલ જ હોય. સુરતમાં પોલીસે એક એવી ફેક્ટરીનો પર્દાફાશ કર્યો છે કે જ્યાં બ્રાન્ડેડ કંપનીના નામે નકલી ઘી તેમજ તેલ બનાવવામાં આવતું હતું. પોલીસે આ ફેક્ટરીમાંથી 358 કિલો જેટલું નકલી ઘી તેમજ તેલ જપ્ત કર્યું હતું. ચોંકાવનારી વાત એ છે કે, અહીં અમૂલ, સુમુલ, સાગર ઘી તેમજ ફોર્ચ્યુન ઓઈલ જેવી બ્રાન્ડ્સના પેકમાં નકલી ઘી તેમજ તેલ ભરીને વેચવામાં આવતા હતા. વળી, જે જગ્યાએ ઘી અને તેલ બનાવાતા હતા તે એટલી ગંદી હતી કે તેને જોઈ પોલીસ પણ ચોંકી ઉઠી હતી.

સુરતના રાંદેર વિસ્તારમાંથી પકડાયેલી નકલી ઘી-તેલની ફેક્ટરીમાંથી પોલીસે ત્રણ લોકોની પણ ધરપકડ કરી છે. આ લોકો સનફ્લાવર ઓઈલ, વનસ્પતી ઘી, ઘીના ફ્લેવર તેમજ પીળા રંગ દ્વારા નકલી ઘી બનાવતા હતા, અને તેનું બ્રાન્ડેડ કંપનીઓના નામે વેચાણ કરવામાં આવતું હતું. પાલનપુર પાટિયા પાસે આવેલા મશાલ ચોકમાં આ વેરહાઉસ ધમધમતું હતું, અને ફોર્ચ્યુન કંપનીના અધિકારીઓએ તેના વિશે બાતમી આપતા પોલીસે ત્યાં રેડ પાડી હતી.


પોલીસના હાથે વેરહાઉસમાંથી ઝડપાયેલા જનક ભજિયાવાલા અને સંજીવ નાદકર્ણી નામના શખ્સોએ જણાવ્યું હતું કે તેઓ આ ડુપ્લિકેટ માલ જયેન્દ્ર લાખાણી નામના શખ્સની માલિકીની દીવા ટ્રેડર્સ નામની પેઢીને સપ્લાય કરે છે. પોલીસે ત્યારબાદ લાખાણીના ગોડાઉન પર પણ રેડ કરી હતી, અને ત્યાંથી પણ નકલી ઘી-તેલનો જથ્થો મળતાં જયેન્દ્ર લાખાણીની ધરપકડ કરવામાં આવી હતી.


નકલી ઘી અને તેલ બનાવવામાં શંકર મારવાડી અને મંગલ મારવાડી નામના બે શખ્સોની સામેલગીરી પણ બહાર આવી છે, પરંતુ બંને હાલ ફરાર છે. પીસીબીના પીઆઈ સંજય ભાટિયાના જણાવ્યા અનુસાર, આરોપીઓ વિરુદ્ધ ભેળસેલ, ટ્રેડમાર્ક્સ એક્ટ તેમજ કોપીરાઈટની વિવિધ કલમો હેઠળ ગુનો નોંધવામાં આવ્યો છે. આરોપીઓ સનફ્લાવર ઓઈલ, કલર, ઘી ફ્લેવર અને વનસ્પતી ઘીને ઉકાળતા હતા. તે લિક્વિડ બની જાય ત્યારબાદ એકદમ અસલી ઘી જેવું દેખાતું અને ટેસ્ટ પણ તેવો જ આવતો હતો.