સુરતઃ માત્ર પુરૂષના નામે પ્રધાનમંત્રી આવાસ ધરાવતા લોકોને પણ હવે મળશે સબસિડીનો લાભ

સુરતઃ પ્રધાનમંત્રી યોજનામાં જે કોઈએ સરકારી આવાસ મેળવ્યા બાદ માત્ર પતિનું નામ હોવાથી જે લોકોને સબસિડીનો લાભ મળ્યો નથી તેમના માટે સારા સમાચાર છે. સુરત મહાનગર પાલિકા દ્વારા ફાળવવામાં આવેલા આવાસમાં આવા અનેક અરજદારો હતો કે જેમને આ કારણે સબસિડીનો લાભ મળતો નહતો. પરંતુ હવે તેઓ માત્ર 100 રૂપિયા સ્ટેમ્પ ડ્યૂટી ભરી સરકારી આવાસના દસ્તાવેજમાં પતિ સાથે પત્નીનું નામ દાખલ કરાવી શકશે. ત્યાર બાદ તેમને પ્રધાનમંત્રી આવાસ યોજના અંતર્ગત મળતી સબસિડીનો લાભ મળી શકશે.

પ્રધાનમંત્રી આવાસ યોજના અંતર્ગત ગરીબ અને મધ્યમવર્ગના પરિવારજનો પોતાનું મકાન કરી શકે તે માટે તેમને રાહત દરે મકાનની ફાળવણી કરવામાં આવે છે. સુરત મહાનગર પાલિકા દ્વારા પણ સુરતના અલગ અલગ વિસ્તારોમાં EWS અને LIG આવાસોની ફાળવણી કરવામાં આવી છે. આ સરકારી આવાસ ઉપર કેન્દ્ર સરકારની પ્રધાનમંત્રી યોજના અંતર્ગત સરકારી સબસિડી આપવામાં આવે છે. PMAY હેઠળ 2.67 લાખ રૂપિયા સુધીની સબસીડી મેળવવા માટે દસ્તાવેજમાં ઘરના મહિલા સભ્યનું નામ હોવું જરૂરી છે.

આ સબસિડી યોજનાનો લાભ લેવા માટે ઘણા અરજદારોને મુશ્કેલી પડી રહી હતી. કારણે કે તેમના આવાસના દસ્તાવેજમાં માત્ર પુરૂષનું જ નામ હતું. દસ્તાવેસમાં મહિલાનું નામ સાથે ન હોવાથી બેંકો દ્વારા તેમને આ સબસિડીનો લાભ આપવામાં આવતો ન હતો. આ બાબતે સુરત મહાનગર પાલિકાને વારંવાર રજૂઆત કરવામાં આવી પરંતુ કોઈ ઉકેલ આવ્યો નહતો. આખરે 800થી વધુ અરજદારોએ નવસારીના સાંસદ સી.આર. પાટીલને પોતાની પડી રહેલી મુશ્કેલી અંગે રજૂઆત કરી હતી.

આ વાતની રજુઆત ભાજપ પ્રમુખ અને નવસારી સાંસદ સી આર પાટીલ સુધી પહોંચતા તેમણે કેન્દ્ર અને રાજ્ય સરકારને આ મામલે રજૂઆત કરી હતી. જે અંગે મુખ્યમંત્રી રૂપાણીએ હકારાત્મક નિર્ણય કરતા રજીસ્ટ્રેશન ફી માફ કરી દીધી છે. રજીસ્ટ્રેશન ફી માફ થતા હવે ફક્ત 100 રૂપિયાની સ્ટેમ્પ ડ્યુટી ભરીને ઘરના મહિલા સભ્યનું નામ દસ્તાવેજમાં ઉમેરી શકાશે. જેનાથી પ્રધાનમંત્રી આવાસ યોજના હેઠળ સબસીડી મેળવવામાં પણ સીધો લાભ થશે. આમ LIG આવાસ ધારકોને હવે બેવડો લાભ થશે અને રજીસ્ટ્રેશન નું કામ પણ સરળ થશે.