સુરતઃ SBI ATMમાંથી કેશ બહાર આવે એટલે ચાલાકીથી રૂપિયા કાઢી લઈને રીફંડ લેતો હતો ભેજાબાજ, ભાંડો ફૂટ્યો

ATM મશિન હાઈટેક ટેક્નોલોજી સાથે બનાવવામાં આવ્યું છે અને તે કઈ રીતે કામ કરે છે તે અંગે ઘણાંને સવાલ થતા હોય છે. પરંતુ આ હાઈટેક ટેક્નોલોજીનો પણ તોડ કરીને રૂપિયા ચોરી લેનારા લોકોના કિસ્સા બનતા જ રહે છે. સુરત શહેરના સાંદેર રોડ પર આવેલી નવયુગ કૉલેજની સ્ટેટ બેંક ઓફ ઈન્ડિયાની શાખામાંથી એક ભેજાબાજે સોફ્ટવેરમાં ચેડા કરીને કેશ ઉપાડી લીધા પછી બેંકમાં ફરિયાદ કરી કે મને તો રૂપિયા મળ્યા જ નથી અને ખાતામાંથી કપાઈ ગયા છે. બેંકના મેનેજરે ખાતાધારકના અકાઉન્ટમાં રીફંડ પણ જણા કરાવી દીધું હતું. પરંતુ પાછળથી તપાસ કરતા માલુમ પડ્યું કે જે વ્યક્તિએ રીફંડ લીધું છે તેણે જ બેંકના ATMમાં કેશ ડિસ્પેન્સર સોફ્ટવેર સાથે ચેડા કર્યા હતા. બનાવની મળતી વિગતો એવી છે કે નવયુગ કૉલેજના શિવમ કોમ્પ્લેક્ષમાં આવેલા ATMમાંથી જે શખ્સે 5 ટ્રાન્ઝેક્શન કર્યા પછી રૂપિયા ના ઉપડ્યા હોવાનું અને ખાતામાંથી કપાઈ ગયા હોવાનું કહ્યું હતું તે અંગે તપાસ કરતા સોફ્ટવેર સાથે ચેડા થયા હોવાનું માલુમ પડ્યું હતું. બેંકના મેનેજર રાકેશ યાદવે ખાતાધારકને રૂપિયા રીફંડ કર્યા પછી બ્રાન્ચ મેનેજરની મદદથી CCTV ફૂટેજની તપાસ કરી ત્યારે માલુમ પડ્યું કે જે વ્યક્તિએ રીફંડ લીધું હતું તેણે જ કેશ ડિસ્પેન્સરમાં રોકડ આવે ત્યારે તેને આંગળીથી પકડી રાખીને ચેડા કરતો હતો.

ATM સોફ્ટવેર સાથે ચેડા કરનારા શખ્સે ઓનલાઈન ફરિયાદ કરી હતી જે પાછલા મહિને 4 અને 5 ઓગસ્ટે રાકેશ યાદવને મળી હતી. આ પછી તપાસ કરતા માલુમ પડ્યું કે ચેડા કરનારા વ્યક્તિએ કાર્ડ અને પીન એન્ટર કર્યા પછી કેશ ડિસ્પેન્સર પકડી લેતો હતો જેથી સોફ્ટવેરમાં ખામી સર્જાતા ક્લીયરિંગ એરર આવી જતી હતી. આ પછી ગણતરીની સેકન્ડોમાં ATM પ્રોગ્રામ રીસેટ થઈ જતું હતું, આમ કરીને તકનો લાભ લઈને ચેડા કરનારો શખ્સ રૂપિયા ખિસ્સામાં મૂકી દેતો હતો.

ભેજાબાજે રૂપિયા ઉપાડી લીધા પછી પણ રીફંડની માગણી કરી હતી અને બેંક દ્વારા તેની ચૂકવણી પણ કરાઈ હતી, જોકે, ગણતરીના અંતે ટ્રાન્ઝેક્શનનો આંકડો મેચ ના થતા તપાસ કરવામાં આવી જેમાં આખો ભાંડો ફૂટ્યો હતો કે રીફંડ મેળવનારા શખ્સ દ્વારા જ ATMમાં ચેડા કરવામાં આવતા હતા, જે CCTV ફૂટેજ તપાસતા સાબિત થયું હતું. બેંક દ્વારા આ શખ્સ સામે રાંદેર પોલીસ સ્ટેશનમાં ફરિયાદ નોંધાઈ છે.