પોલીસ હેડક્વાર્ટર બહાર કોન્સ્ટેબલ સુનિતા યાદવની રકઝક
સુરતઃ રાજ્યના આરોગ્ય મંત્રી કુમાર કાનાણીના પુત્ર સાથે ઘર્ષણને લઈને મહિલા કોન્સ્ટેબલ સુનિતા ચર્ચામાં આવી છે. આજે પોલીસ હેડક્વાર્ટર પહોંચેલી મહિલા કોન્સ્ટેબલ સુનિતા યાદવ અને પોલીસ વચ્ચે રકઝક થઈ હતી. પોલીસ અધિકારીઓ સુનિતાને બળજબરીપૂર્વક અંદર લઈ ગયા હતા. મીડિયા પાસે આવવા જતા મીડિયાથી પણ તેમને દૂર રાખવામાં આવીને પોલીસ અધિકારીઓ અંદર લઈ ગયા હતા.
હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો
મંત્રીના દીકરા સહિત 3 સામે કર્ફ્યૂ ભંગનો ગુનો
મહિલા કોન્સ્ટેબલ સુનિતા સાથે ઘર્ષણ મામલે રાજ્યના આરોગ્યમંત્રી કાનાણીના પુત્ર સહિત ત્રણ વ્યક્તિઓની અટકાયત કરવામાં આવી હતી. આ ઘટના મામલે સુરત પોલીસ કમિશનરે તપાસના આદેશ આપ્યા હતાં. જે પછી મંત્રીના દીકરા અને તેના દોસ્તો સામે કર્ફ્યૂ ભંગનો ગુનો દાખલ કરવામાં આવ્યો હતો. જોકે, ગણતરીના કલાકોમાં તેમને જામીન પર છોડી મૂકાયા હતાં.
શું હતી સમગ્ર ઘટના?
હીરાબજારમાં ફરજ દરમિયાન કોન્સ્ટેબલ સુનિતા યાદવે રાત્રે દસ વાગ્યા પછી કારમાં માસ્ક વગર આવેલા પાંચ લોકોને કર્ફ્યૂ ભંગ બદલ અટકાવ્યા હતાં. જોકે, ત્યારબાદ તેમાંથી એક યુવકે રાજ્ય આરોગ્ય મંત્રી કુમાર કાનાણીના દીકરાને ફોન કરીને બોલાવ્યા હતાં. જે પછી કુમાર કાનાણીના દીકરા પ્રકાશ કાનાણી અને કોન્સ્ટેબલ સુનિતા યાદવ વચ્ચે બોલાચાલી થઈ હતી. વાયરલ થયેલા વિડીયોમાં સુનિતાને 365 દિવસ ફરજ માટે ઉભી રાખવાની ચીમકી પણ અપાઈ હતી. આ ઉગ્ર બોલાચાલીનો ઓડિયો પણ સોશિયલ મીડિયામાં વાયરલ થયો હતો. જે પછી સુનિતા યાદવે રાજીનામું આપ્યું હતું.
સોશિયલ મીડિયામાં છવાયો મુદ્દો
આરોગ્ય મંત્રીના દીકરા અને મહિલા કોન્સ્ટેબલ વચ્ચે વિવાદનો મુદ્દો સોશિયલ મીડિયામાં પણ છવાયેલો રહ્યો હતો. બન્ને વચ્ચે વિવાદનો વિડીયો પણ સોશિયલ મીડિયામાં ખૂબ જ વાયરલ થયો હતો. સુનિતા યાદવને સોશિયલ મીડિયામાંથી પણ સપોર્ટ મળ્યો હતો. #i_support_sunita_yadav ટ્રેન્ડિંગમાં રહ્યું હતું. આરોગ્ય મંત્રીના દીકરા અને સુનિતા યાદવ વચ્ચેની આ ઘટના ટોક ઓફ ધ ટાઉન રહી હતી.