ખીચડી બાદ વધુ એક કૌભાંડ! 47000 કૂતરા પકડવા માટે સુરત મહાનગર પાલિકાએ 3.47 કરોડ રૂપિયા ખર્ચ્યા

સુરતઃ થોડા દિવસો પહેલાની જ વાત છે કે સુરત કોર્પોરેશનમાં 'રસોડા કૌભાંડ'ની ખૂબ ચર્ચા ચાલી રહી છે ત્યારે વધુ એક કૌભાંડ હોવાની માહિતી સામે આવી રહી છે. આરટીઆઈ દ્વારા મળેલી માહિતી મુજબ સુરત મહાનગર પાલિકાએ છેલ્લા છ વર્ષમાં 47000 કૂતરાઓને પકડવા માટે 3.47 કરોડ રૂપિયા ખર્ચ કર્યા હોવાનું જણાવ્યું છે. આ માહિતી સામે આવ્યા બાદ હવે કોંગ્રેસના કોર્પોરેશન દ્વારા કૂતરા પકડવામાં પણ કૌભાંડ હોવાનો આક્ષેપ કર્યો છે.

RTI એક્ટિવિસ્ટ દ્વારા સુરત મહાનગર પાલિકા પાસે આ અંગે જવાબ માંગવામાં આવ્યા હતા. તેનો જવાબ આપતા કોર્પોરેશન જણાવ્યું કે, જાન્યુઆરી 2014થી સપ્ટેમ્બર 2020 સુધીમાં કુલ 47,133 કૂતરાઓનેપકડવામાં આવ્યાં છે. પકડાયેલા કૂતરાઓ પૈકી 43,791 કૂતરાઓનું ખસીકરણ કરવામાં આવ્યું છે. પાલિકા દ્વારા નસબંધી માટે ટેન્ડર પ્રક્રિયા દ્વારા શરતોને આધિન હૈદરાબાદની વેટ્સ સોસાયટી ફોર એનિમલ વેલ્ફેર એન્ડ રૂરલ ડેવલપમેન્ટને 3.7 કરોડની કામગીર સોંપવામાં આવી હતી. જેમાં જાન્યુઆરી 2014થી સપ્ટેમ્બર 2020 દરમિયાન 3.47 કરોડનો ખર્ચ કરવામાં આવ્યો છે. સાથે જ પાંજરાઓના કલરકામ માટે 1.67 લાખનો ખર્ચ કરવામાં આવ્યો છે.


આ માહિતી સામે આવ્યા બાદ શહેરમાં આ મુદ્દો ચર્ચાનો વિષય બન્યો છે. કોંગ્રેસના કોર્પોરેટર તેમજ અન્ય વિરોધી લોકો ટેન્ડર પ્રક્રિયામાં કૌભાંડ હોવાનો આક્ષેપ કરી રહ્યા છે. RTI એક્ટિવિસ્ટ તુષાર મેપાણીએ કહ્યું કે, હાલ શહેરમાં કૂતરાંઓનો ત્રાસ વધી રહ્યો છે. જેથી મેં પાલિકા પાસે જવાબ માંગ્યો હતો. જેમાં પાલિકાએ કરોડો રૂપિયાનો ખર્ચ કર્યો હોવા છતાં કૂતરાંઓનો ત્રાસ વધી રહ્યો છે. તો બાબતે હવે અમે રજૂઆત કરીશું કે જે કોઈને કામગીરી સોંપવામાં આવી છે તેનું યોગ્ય રીતે મૂલ્યાંકન કરવામાં આવે અને પ્રજાની મુશ્કેલીને ધ્યાનમાં રાખીને યોગ્ય કામગીરી અને નિર્ણય કરવામાં આવે.