સુરતઃ અભ્યાસ બાબતે માતાએ ઠપકો આપતા ધો.10ની વિદ્યાર્થિનીએ ઉત્તરાણના દિવસે કર્યો આપઘાત

સુરતઃ કોરોનાને કારણે છેલ્લા એક વર્ષથી શાળા કોલેજો બંધ છે. વિદ્યાર્થીઓનો અભ્યાસ ઓનલાઈન ચાલી રહ્યો છે. આ વચ્ચે સુરતના ડીંડોલી વિસ્તારમાં ધોરણ-10ની વિદ્યાર્થિનીને તેની માતાએ અભ્યાસ માટે ઠપકો આપતા લાગી આવ્યું. વિદ્યાર્થિનીએ ઉત્તરાણના દિવસે જ ઘરમાં આપઘાત કરી લીધો.

મૂળ મહેસાણાના વતની પ્રકાશભાઈ પટેલ ડીંડોલી વિસ્તારમાં આવેલી આલોક રેસિડેન્સીમાં રહેતા હતા. તેમની એકની એક દીકરી ખુશી ધોરણ 10માં અભ્યાસ કરી હતી. હાલમાં શાળાઓ બંધ હોવાથી તેમનો ઓનલાઈન અભ્યાસ ચાલતો હતો. ઉત્તરાયણના રોજ ઓનલાઈન અભ્યાસના હોમવર્ક બાબતે માતાએ ઠપકો આપ્યો અને સ્કૂલના શિક્ષકને ફોન કરીને દીકરીની ફરિયાદ કરી હતી.

આ બાબતે ખુશીને લાગી આવ્યું હતું. જેથી ઉત્તરાયણના દિવસે પરિવારના સભ્યો ધાબા પર હતા ત્યારે ઘરની અંદર ઝેરી દવા પી લઈ લીધી હતી. પરિવારજનોને ખબર પડી તો તેને તુરંત સારવાર માટે નવી સિવિલ હોસ્પિટલ લઈ ગયા હતા જ્યાં ટુંકી સારવાર બાદ વિદ્યાર્થિનીનું મોત નિપજ્યું હતું. આ બાબતે પરિવારજોનું કહેવું છે કે તેમની દીકરીનો સ્વભાવ થોડો ગુસ્સાવાળો હતો. આપઘાત અંગે ડીંડોલી પોલીસે વધુ તપાસ હાથ ધરી છે.