સુરતઃ આજીવન કેદનો ગુનેગાર 28 વર્ષે પોલીસના હાથે આવ્યો, 3 દેશોમાં રહીને કર્યું કડિયાકામ

સુરતઃ તમે અનેક વખત સમાચાર સાંભળ્યા હશે કે આરોપી પેરોલ જમ્પ કરીને ફરાર થઈ ગયો. આવો જ એક આરોપી વડોદરાની જેલમંથી ફરાર થઈ ગયો હતો જેને 28 વર્ષ પછી સુરત પોલીસે રાજસ્થાનથી ઝડપી પાડ્યો. કેદીએ 36 વર્ષ પહેલા ઝઘડામાં પડોશીની હત્યા કરી નાંખી હતી. જે કેસમાં કોર્ટે તેને આજીવન કેદની સજા ફટકારી હતી. જેલમાંથી ફરાર થયા બાદ ગુનેગાર દુબઇ, સાઉદી અરેબિયા અને દક્ષિણ આફ્રિકામાં કામ કડિયાકામ કરતો હતો.

રાજસ્થાનના ઝુંઝનું શહેરનો અનવર હુસૈન મોહંમદ યાસિન(59) 1984માં પરિવાર સાથે સુરતના ઉધના વિસ્તારમાં રહેતો હતો. ઝઘડાની અદાવતમાં તેણે પાડોશી ઉસ્માન હાજી સત્તાર કુરેશીની હત્યા કરી હતી. પોલીસે અનવરની ધરપકડ કરી કોર્ટમાં રજૂ કર્યો હતો. ત્રણ વર્ષ કોર્ટમાં કેસ ચાલ્યા બાદ તેને આજીવન કેદની સજા સંભળાવવામાં આવી હતી

ત્યાર બાદ વડોદરા મધ્યસ્થ જેલમાં અનવર હુસેન માતાની બીમારીની સારવાર માટે પેરોલ પર છૂટ્યો હતો. જોકે, હાજર થવાના બદલે તે ફરાર થઇ ગયો હતો. ફરાર અનવર હુસેન પોતાના પાસપોર્ટ પર દુબઇ, દક્ષિણ આફ્રિકા અને સાઉદી અરેબિયામાં જતો રહ્યો હતો અને ત્યા કડિયાકામ કર્યું હતું. છેલ્લા 8 વર્ષથી રાજસ્થાનના ઝુંઝનુંમાં રહેતો હતો. સુરત ક્રાઇમ બ્રાન્ચને તેની સચોટ માહિતી મળતાં તેના વતન જઈ ઝડપી પાડી વડોદરા મધ્યસ્થ જેલના હવાલે કર્યો છે.