સુરતના કોરોના વોરિયર ડો. મહેતા ચેન્નઈમાં ECMO ટ્રિટમેન્ટના સાત દિવસ બાદ ભાનમાં આવ્યા

સુરતઃ કોવિડ-19 વૃદ્ધ દર્દીનો જીવ બચાવવા પોતાનું ઓક્સીજન માસ્ક ઉતારીને આપનારા કોરોના વોરિયર એનેસ્થેસ્યોલોજિસ્ટ ડો. સંકેત મહેતા ચેન્નઈની MGM હોસ્પિટલમાં સાત દિવસની ટ્રિટમેન્ટ બાદ ભાનમાં આવ્યા. તેમના ફેફસા હવે સંપૂર્ણ રીતે ફુલાઈ રહ્યા છે. ડો. મહેતાને આ પહેલા સુરતના અડાજણમાં આવેલી BAPS હોસ્પિટલમાં 47 દિવસ સુધી રખાયા હતા. જેમાં 25 દિવસ તેઓ વેન્ટીલેટર પર હતા અને 22 દિવસ માટે ECMO ટ્રિટમેન્ટ પર હતા. તેમની સ્થિતિ વધારે ગંભીર થવા પર 13મી સપ્ટેમ્બરે એર એમ્બ્યુલન્સ મારફતે MGM હોસ્પિટલ લઈ જવાયા હતા.

પરિવારના સભ્યોએ જણાવ્યું કે, જ્યારે તેમને MGM હોસ્પિટલ લવાયા હતા ત્યારે ડોક્ટર્સે જોયું કે શ્વાસનળીમાં વધારે પડતું પરું નીકળવાના કારણે તેમના બંને ફેફસા સંકોચાઈ ગયા હતા. તેમને તાત્કાલિક 100 ટકા એડવાન્સ ECMO ટ્રિટમેન્ટ પર મૂકવામાં આવ્યા. ડોક્ટર્સે જણાવ્યું કે, સાત દિવસની ટ્રિટમેન્ટ બાદ ડો. મહેતા સંપૂર્ણ રીતે ભાનમાં આવી ગયા છે અને પરુનો સ્ત્રાવ ઝડપથી ઘટી રહ્યો છે. તેમનું ECMO સેટિંગ 100 ટકાથી ઘટાડીને 50 ટકા કરાયું છે.

સુરત એનેસ્થેટિસ્ટ એસોસિયેશનના વાઈસ-પ્રેસિડેન્ટ ડો. હિરલ શાહે TOIને કહ્યું, આ ડોક્ટર્સ અને ડો. મહેતાની સારવાર માટે ડોનેશન કરનારા દેશભરના લોકો માટે ખૂબ જ સારા સમાચાર છે. તે સંપર્ણ રીતે ભાનમાં આવી ગયા છે અને ફેફસાંમાં પરુંનો સ્ત્રાવ પણ ઘટી રહ્યો છે.

ડો. શાહ વધુમાં કહે છે, તેમની શ્વાસનળીની ટ્રિટમેન્ટ શનિવારે કરવામાં આવી અને ક્લિનિકલ કેર ન્યૂરોથેરાપી માટે ઝડપી ફિઝિયોથેરાપી ચાલી રહી છે. અમને આશા છે કે ડો. મહેતા જલ્દી જ રિકવર થઈ જશે અને સુરતના લોકોની ફરીથી સેવા કરવા માટે આવશે.

SAAના પ્રેસિડેન્ટ અને ચેન્નઈમાં ડો. મહેતાના પરિવાર સાથે રહેતા ડો. જયેશ ઠક્કરાલ કહે છે, અમે સુરતના લોકો અને ડોક્ટર્સને પ્રાર્થના કરવા માટે કહ્યું છે. એવું લાગે છે કે ડો. મહેતા માટે પ્રાર્થના કામ આવી ગઈ. આ ચમત્કાર જ છે કે અઠવાડિયામાં જ તેમની સ્થિતિ એકદમ સુધરી ગઈ. તેમના ફેફસા હવે ફુલાઈ રહ્યા છે, આથી જો બધુ સારું રહ્યું તો આગામી દિવસોમાં તેમની ECMO ટ્રિટમેન્ટ પણ બંધ કરી દેવામાં આવશે.