સુરતઃ પોતાનું ઓક્સિજન માસ્ક કાઢીને અન્ય દર્દીનો જીવ બચાવનારા ડો. મહેતાની સ્થિતિ ગંભીર

સુરતમાં કોરોનાની મહામારીથી સંક્રમિત એક ડોક્ટરે અન્ય દર્દીની તકલીફ જોતા પોતાનું ઓક્સીજન માસ્ક ઉતારીને તેને લગાવીને જીવ બચાવ્યો હતો. તેમના આ કાર્ય માટે ડો. સંકેત મહેતાની ખૂબ પ્રશંસા થઈ હતી. જોકે ડો. સંકેત છેલ્લા 42 દિવસથી કોરોના સામે જંગ લડી રહ્યા છે. અને તેમની સ્થિતિ વધારે ગંભીર બની રહી છે. ડોક્ટર સંકેતની સ્થિતિ વધુ ગંભીર બનતા તેમને એરલિફ્ટ કરીને ચેન્નઈ લઈ જવામાં આવ્યા હતા, જ્યાં તેમનું ફેફસાંનું ટ્રાન્સપ્લાન્ટ કરવામાં આવશે.

સુરતના ડોક્ટર સંકેત મહેતા કોરોના સંક્રમિત થયા બાદ વેન્ટીલેટર પર રખાયા હતા. આ દરમિયાન ICUમાં અન્ય દર્દીનો જીવ બચાવવા માટે પોતાનું હાઈ લેવલનું ઓક્સિજન માસ્ક ઉતારીને ઊભા થઈને અન્ય દર્દીનો તેમણે જીવ બચાવ્યો હતો. તેમને 25 દિવસ સુધી વેન્ટીલેટર પર રાખાયા હતા, હાલમાં તેઓ છેલ્લા 22 દિવસથી ઈકનોમો સપોર્ટ છે. જોકે તેમ છતાં સ્થિતિમાં સુધારો ન આવતા તેમના ફેફસા ટ્રાન્સપ્લાન્ટ કરવાની જરૂર ઊભી થઈ હતી. આ માટે તેમને ચેન્નઈ એરલિફ્ટ કરવામાં આવ્યા હતા.

જોકે ફેફસાં ટ્રાન્સફર કરવાની પ્રક્રિયા ખૂબ જ મોંઘી હોય છે અને આ માટે 1 કરોડ રૂપિયા જેટલો ખર્ચ થતો હોય છે. ત્યારે મુશ્કેલીના આ કપરા સમયમાં તબીબી જગત તેમની તથા પરિવારજનોની પડખે ઊભું રહ્યું છે. પરિવાર તથા તબીબો મળીને અત્યાર સુધી 35 લાખ રૂપિયા એકઠા કરી શક્યા છે. આ માટે દરેક ડોક્ટર્સ પોતાની શક્તિ મુજબ ડોક્ટરની મદદ કરી રહ્યા છે. બીજી તરફ સુરતની જનતા તથા ઉદ્યોગપતિઓ પણ આ બહાદૂર ડોક્ટરને મદદ કરવા માટે આગળ આવી રહ્યા છે. ત્યારે હવે સુરત સહિત ગુજરાતના લોકો પણ આ ડોક્ટરની મદદ માટે આગળ આવે તેવી આશા સેવાઈ રહી છે.

સુરતના એનેસ્થેસિસ્ટ એસોસિયેશન (SAA)એ પણ જીવલેણ કોરોના વાયરસ સામે લડી રહેલા ડો. મહેતની મદદ માટે લોકોને ડોનેશન કરવાની વિનંતી કરી છે. SAAના વાઈસ પ્રેસિડેન્ટ ડો. હિરલ શાહ કહે છે, એડવાન્સ્ડ ECHO અને ફેફસા ટ્રાન્સપ્લાન્ટ ખૂબ જ મોંઘી પ્રોસેસ છે. અમે તેમનો જીવ બચાવવા ડોક્ટર્સ અને સામાન્ય લોકોને તેઓ આપી શકે તેટલું ડોનેટ કરવાની અપીલ કરી છે.