BAPS હોસ્પિટલમાં તેમને દાખલ કરવામાં આવ્યા હતા
સુરતના ડોક્ટર સંકેત મહેતા કોરોના સંક્રમિત થયા બાદ સુરતની BAPS હોસ્પિટલમાં વેન્ટીલેટર પર રખાયા હતા. આ દરમિયાન ICUમાં અન્ય દર્દીનો જીવ બચાવવા માટે પોતાનું હાઈ લેવલનું ઓક્સિજન માસ્ક ઉતારીને ઊભા થઈને અન્ય દર્દીનો તેમણે જીવ બચાવ્યો હતો. તેમને 25 દિવસ સુધી વેન્ટીલેટર પર રાખાયા હતા. ત્યાર બાદ તેમના ફેફસા ટ્રાન્સપ્લાન્ટ કરવાની જરૂર ઊભી થઈ હતી.
એર એમ્બુલન્સથી તેમને ચેન્નઈ લઈ જવામાં આવ્યા
ડો. મહેતાને 13 સપ્ટેમ્બરે એર એમ્બ્યુલન્સ મારફતે ચેન્નઈની એમજીએમ હોસ્પિટલમાં અદ્યતન એક્સ્ટ્રાકોર્પોરિયલ મેમ્બ્રેન ઓક્સિજન અને ફેફસાના ટ્રાન્સપ્લાન્ટ માટે ખસેડવામાં આવ્યા હતા. આ પ્રક્રિયા પાછળ અંદાજે 1 કરોડનો ખર્ચ હોવાથી તેમની આર્થિક મદદે ઉદ્યોગપતિઓ અને સુરતના લોકો આગળ આવ્યા અને તેમના માટે રૂપિયા એકત્રિત કર્યા હતા. સહાયનો એટલો ધોધ વહ્યો કે આખરે સહાય માટે તેમણે ના પાડવી પડી.
મદદ માટે અનેક લોકો આગળ આવ્યા
એમજીએમના ડોકટરોએ જણાવ્યું કે તેઓ તેના ફેફસાંને બચાવવાનો પ્રયાસ કરી રહ્યા છે. ટ્રાન્સપ્લાન્ટ અંતિમ વિકલ્પ છે. એર એમ્બ્યુલન્સમાં તેમની સાથે આવેલા ડો. જયેશ ઠકરાલે જણાવ્યું હતું કે, 'ડોકટરો, ઉદ્યોગપતિઓ અને સુરતના નાગરિકોએ ડો.મહેતાની સારવાર માટે એક ભંડોળ બનાવ્યું છે. સારવારમાં અત્યાર સુધીમાં 55 લાખનો ખર્ચ થઈ ચૂક્યો છે. અમે અહીં બીજા 4 અઠવાડિયા માટે રહેશું તેવી સંભાવના છે. સારવારનો દૈનિક ખર્ચ લગભગ 1.25 લાખ રૂપિયા સુધી આવે છે. જો ડોકટરો તેના ફેફસાં પ્રત્યારોપણ કરવાનું નક્કી કરે છે, તો તેનો ખર્ચ 50 લાખ રૂપિયા થશે.'