Bachchan@78: સુરતી ફેન પાસે બિગ બીના 7000 ફોટોનું કલેક્શન, 10 વાર કરી રૂબરુ મુલાકાત

દિવ્યેશ કુમારે ANIને જણાવ્યા મુજબ વર્ષ 1999થી અમિતજીના ફોટા સંગ્રહ કરવાનું શરૂ કર્યું. જેમાં પાસપોર્ટ સાઇઝથી લઈને મૂવી પોસ્ટર સુધી તમામ જગ્યાએથી તમામ પ્રકારના ફોટા એકત્રિત કર્યા. જ્યારે પણ તેમને અમિતજીનો કોઈ ફોટો મળે ત્યારે તેને કટ કરીને બાદમાં આલ્બમમાં સાચવી રાખે છે. અત્યાર સુધી તેઓએ અમિતજીના 7,000થી વધુ ફોટા એકત્રિત કર્યા છે. હાલ દિવ્યેશભાઈના ઘરે આખો રૂમ ભરીને અમિતજીના ફોટોઝ છે.

અમિતાભ બચ્ચનના 78માં જન્મદિવસ નિમિત્તે કુમારે તેમની ફિલ્મ 102 નોટ આઉટની જેમ અભિનેતાના લાંબા અને સુખી જીવનની શુભેચ્છા પાઠવી હતી. દિવ્યેશે કહ્યું કે, હું આશા રાખું છું કે અમિતજી પણ 102 વર્ષ સુધી નોટ આઉટ રહે. દિવ્યેશ અત્યારસુધી 10 વાર બચ્ચનને મળી ચૂક્યા છે. અને બે દાયકામાં અમિતજીના પાસપોર્ટ સાઈઝ ફોટાથી માંડીને મૂવી પોસ્ટર્સ સુધીના ફોટોનું કલેક્શન ભેગું કર્યું છે.

દિવ્યેશ કુમારે હસતા-હસતા જણાવ્યું કે, અમિત જીને હું પહેલી વાર મળ્યો ત્યારે મેં તેમને એક પિક્ચર આપ્યું હતું જેમાં અત્યાર સુધી તેમણે કરેલી બધી ફિલ્મોનાં નામ હતાં. મેં તેમની પૌત્રી માટે એક ખાસ રમકડું પણ આપ્યું. જ્યારે તેમણે મને પૂછ્યું કે આ કેવી રીતે બનાવ્યું ત્યારે મેં સરને કહ્યું, 'યે તો ટ્રેલર હૈ સર, પિક્ચર અભી બાકી હૈ.' અમિતાભજીએ તેમના મૃત્યુ પછી તેમના અંગો દાન કરવાનું સાઈન અપ કરીને ખૂબ ઉમદા કામ કર્યું છે. હું તેમની પ્રેરણાથી પ્રેરિત છું અને મેં મારા પરિવાર સાથે પણ આ જ કર્યું છે.