યજ્ઞેશ ભરત મહેતા, સુરતઃ જો તમે સુરતમાં 100-200 ખેલૈયાઓને હેલમેટ પહેરી ગરબા કરતા જુઓ તો એમ ન સમજતા કે તે દાંડિયાથી માથુ બચાવવા હેલમેટ પહેરીને ફરે છે. શહેરના ટ્રાફિક પોલીસે ટ્રાફિકના નિયમો અંગે જાગૃતિ ફેલાવવા માટે આ અનોખો પ્રયાસ હાથ ધર્યો છે. સુરતની એક NGOએ ટ્રાફિક પોલીસ સાથે મળીને આ પહેલ કરી હતી. તેમાં 1800 જેટલા સ્વયંસેવકોએ જુદા જુદા સ્થળે હેલમેટ ગરબા કર્યા હતા.
હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરોઆ સ્વયંસેવકોમાં બધા પુરુષો જ છે. તેઓ કતારગામમાં આવેલા એક હોલમાં છેલ્લા થોડા દિવસથી પ્રેક્ટિસ કરી રહ્યા છે. આ બધા જ સ્વયંસેવકોએ એક જગ્યાએ ભેગા થશે, પોતાનું હેલમેટ સાથે લાવશે. તેમને પોલીસે ખાસ લેટર પણ આપી રાખ્યો છે જેનાથી તેમને ગરબાના વેન્યુ પર એન્ટ્રી મળશે. એક સ્વયંસેવકે કહ્યું, “શરૂઆતમાં હેલમેટ પહેરીને ગરબા કરવા કમ્ફર્ટેબલ નહતા પરંતુ અમે છેલ્લા થોડા દિવસથી પ્રેક્ટિસ કરી રહ્યા છીએ. હવે મજા આવે છે. આ ટ્રાફિકના નિયમો અંગે જાગૃતિ ફેલાવવાનો એક યુનિક પ્રયાસ છે.”
લાઈફલાઈન ચેરિટેબલ ટ્રસ્ટના ઘનશ્યામ ઈટાલિયાએ સુરતના ટ્રાફિક પોલીસ માટે અવેરનેસ કેમ્પેઈન ડિઝાઈન કર્યું છે. તેમણે કેમ્પેઈન માટે સ્વયંસેવક તરીકે જોડાવા ઓનલાઈન લિંક શેર કરી હતી. ટૂંક જ સમયમાં 1800 લોકો ડ્રાઈવમાં જોડાયા હતા. ઈટાલિયાએ ટાઈમ્સ ઑફ ઈન્ડિયાને જણઆવ્યું, “અમે ફેસ્ટિવ સીઝનનો લાભ લેવા માંગીએ છીએ. એટલે જ અમે નવરાત્રિમાં કેમ્પેઈન ચાલુ કર્યું છે. જાગૃતિ ફેલાવવા માટે હેલમેટ સાથે ગરબા એ એકદમ હટકે ટેકનિક છે, જે વધારે લોકોનું ધ્યાન ખેંચશે.”
ત્યારે વીઆર સુરત ખાતે મ્યુઝિક ડિરેક્ટર એન્ડ પ્લેબેક સિંગર મૃણાલ મેડીએ જણાવ્યું હતું કે હાલ કેન્દ્ર સરકાર દ્વારા નવા મોટર વેહિકલ એક્ટને લાગુ કરવામાં આવ્યો છે ત્યારે દરેક નાગરિકની કાયદાનું પાલન કરવાની ફરજ બને છે ત્યારે અમારો આ એજ પ્રયાસ હતો કે લોકો આ વિષે જાગૃત બને.
શહેરના ઈન-ચાર્જ પોલીસ કમિશનર હરેકૃષ્ણ પટેલ જણાવે છે, “ગરબાના સ્થળે તમે ઘણાબધા લોકો સુધી એકસાથે પહોંચી શકો છો અને તેમને ટ્રાફિકના નિયમો અંગે જ્ઞાન આપી શકો છો. અમે જાગૃતિ માટે ઘણી પ્રવૃત્તિઓનું આયોજન કરી રહ્યા છીએ.” કેમ્પેઈનના ભાગ રૂપે પોલીસ અને કેમ્પેઈન કરનારાઓ જે સોસાયટીના 100 ટકા રહેવાસીઓ હેલમેટ અને સીટબેલ્ટનો ઉપયોગ કરતા હશે તેમને પણ બિરદાવશે. ડ્રાઈવના ભાગરૂપે વોલ્યુન્ટરના ઈન્સપેક્શન બાદ વિવિધ પોલીસ સ્ટેશનમાં સીનિયર પોલીસ ઑફિસરના હસ્તે સોસાયટીનું સન્માન કરવામાં આવશે. સ્વયંસેવકો મુખ્ય રસ્તે અવેરનેસ કેમ્પેઈનમાં પણ ભાગ લઈ રહ્યા છે જેમાં વાહનચાલકોને ટ્રાફિકના નિયમો અંગે જાણ કરવામાં આવી રહી છે અને દરેક સાથે સંવાદ કરવામાં આવી રહ્યો છે.
