સુરત: રેલવેના ગરનાળા સાથે ટેમ્પો અથડાયો, ગડર તૂટીને પડતાં બેને ઈજા

સુરતઃ રેલવે સ્ટેશન નજીક આજે બપોરના સમયે ગરનાળામાં લગાવેલી વિશાળ ગડર એક ટેમ્પો પર તૂટી પડી હતી. આ ગડર એટલી વજનદાર હતી કે ટેમ્પોના કેબિનનો કચ્ચરઘાણ નીકળી ગયો. આ ઘટનામાં બે વ્યક્તિઓને ગંભીર ઈજા પહોંચતા સારવાર માટે હોસ્પિટલ ખસેડવામાં આવ્યા છે.

સ્થાનીક લોકો પાસેથી મળી રહેલી માહિતી મુજબ સુરત રેલવે સ્ટેશનની નીચે બનેલા આ ગરનાળામાં દરરોજ ભારે અવર જવર રહે છે. આજે બપોરના સમયે એક ટ્રક પસાર થઈ રહ્યો હતો. ઊંચા વાહનોને રોકવા માટે મૂકેલી ગડર આ ટેમ્પો પર પડી હતી. થોડી જ વારમાં અફરા-તફરીનો માહોલ સર્જાઈ ગયો. ત્યાં બાજુમાં ઊભા રહેલા રીક્ષાવાળાઓ મદદ માટે દોડી આવ્યા. અકસ્માતમાં ટેમ્પો પર ગડર પડતા તેના ડ્રાઇવરને પણ ગંભીર ઇજા થઇ હોવાનું જાણવા મળ્યું છે.


સામાન્ય રીતે રેલવે ગરનાળામાં અનેક ભિક્ષુકો અને ગરીબ લોકો બેઠા હોય છે. આ સાથે છેડા પર એક મોચી પણ દરરોજ બેસીને રોજગારી મેળવે છે. જેમને પણ આ અકસ્માતમાં ગંભીર ઈજા પહોંચી હોવાનું સામે આવ્યું છે. સ્થાનીકોના જણાવ્યા મુજબ મોચીના બંને પગ ગંભીર રીતે ઘવાયા છે. હાલ તેમને સારવાર માટે હોસ્પિટલમાં ખસેડવામાં આવ્યા છે. અકસ્માતને કારણે ભારે ટ્રાફિક સર્જાયો હતો.