સુરત: ઈન્ડસ્ટ્રિયલ લિફ્ટમાં માથું આવી જતા મહિલાનું કરૂણ મોત

સુરતઃ ઉધના વિસ્તારમાં ઇન્ડસ્ટ્રિયલ લિફ્ટમાં માથું આવી જતા એક મહિલાનું મોત થયું છે. હરિઈચ્છા ઇન્ડસ્ટ્રીયલ વિસ્તારમાં આ દુર્ઘટના બની છે. બેરિંગના સ્પેરપાર્ટ્સના ગોડાઉનમાં મહિલા કામ કરતી હતી. આ અંગે ઉધના પોલીસે વધુ તપાસ હાથ શરૂ કરી છે.

મૂળ મહારાષ્ટ્રના વતની અને સુરતમાં પૂજાબેન ઉધના વિસ્તારમાં આવેલા જય અંબે બેરિંગના સ્પેરપાર્ટ્સના ગોડાઉનમાં કામ કરી પરિવારને આર્થિક રીતે મદદરૂપ થતા હતા. આજે ગ્રાઉન્ડ ફ્લોરના ભાગેથી પ્રથમ માળે બેરિંગનો સામાન લઈ જઈ રહ્યા હતા તે દરમિયાન આ અકસ્માત સર્જાયો હતો. પૂજાબેન સામાન લઈ ઉપર પહેલા માળે ગયા બાદ પરત નહીં ફરતા શંકા ગઈ હતી. અન્ય સાથી કર્મચારીઓએ તપાસ કરી તો પૂજાબેનનું ઇન્ડસ્ટ્રિયલ લિફ્ટમાં માથું આવી જતા મોત નીપજ્યું હતું.

મૃતક પૂજાબેન ઈન્દોરવાળાને ત્રણ સંતાનો છે. જેમાં બે પુત્ર અને એક પુત્રી છે. પતિ બેકાર અને દારૂ પીવાની ટેવ ધરાવતા હોવાથી ઘરનું ગુજરાન ચલાવવા માટે પૂજાબેન સાથે તેમનો 17 વર્ષીય પુત્ર પણ આ ફેક્ટરીમાં કામ કરતો હતો. આ ઘટના બની ત્યારે તેમનો પુત્ર પણ ત્યાં હાજર હતો. માતા સાથે થયેલો અકસ્માત જોઈને પુત્ર ભાંગી પડ્યો હતો.