સુરતની થાળી રેસ્ટોરાંના માલિકની 1 કરોડના ડ્રગ્સકાંડમાં ધરપકડ

સુરત: જાણીતી ગુજરાતી થાળી રેસ્ટોરાંના માલિકની ડ્રગ્સકાંડમાં ધરપકડ કરવામાં આવી છે. પોલીસે 22 સપ્ટેમ્બરના રોજ મેફેડ્રોનની હેરફેરનું રેકેટ ઝડપી પાડ્યું હતું. ગુરુવારે ક્રાઈમ બ્રાંચે 41 વર્ષીય આદિલ સલીમ નૂરાનીની ધરપકડ કરી હતી. આદિલ સલીમ નૂરાની 'કંસાર' નામની જાણીતી રેસ્ટોરાં ચલાવે છે.

પોલીસે જણાવ્યું, "આદિલ નૂરાની પોતે પણ ડ્રગ્સનો બંધાણી હતો અને અમને શંકા હતી કે તેણે મુખ્ય આરોપી સલમાન ઉર્ફે અમન મોહમ્મદ હનીફ ઝવેરી સાથે મળીને ભાગીદારીમાં ડ્રગ્સની હેરફેર શરૂ કરી હતી. જો કે, તેની ચોક્કસ ભૂમિકા શું રહી હતી તે વિગતવાર પૂછપરછ બાદ જ જાણવા મળશે." સરોલી સ્થિત નીલમ વે-બ્રિજ પાસેથી આદિલ નૂરાનીની ધરપકડ કરવામાં આવી હતી.

22 સપ્ટેમ્બરે ડુમસ રોડ પરથી 1011.82 ગ્રામ મેફેડ્રોન ડ્રગ્સ સાથે સલમાનની ધરપકડ કરવામાં આવી હતી. સલમાન ડ્રગ્સનો સંગ્રહ કરવા માટે ડુમસ સ્થિત એક એપાર્ટમેન્ટનો ઉપયોગ કરતો હતો, જે આદિલ નૂરાનીની માલિકીનો છે, તેમ પોલીસે જણાવ્યું. પૂછપરછ દરમિયાન આદિલ ભાગીદાર હોવાનું સલમાને જણાવ્યું હતું.

ઘોડદોડ રોડ ખાતે રહેતા આદિલે પોલીસને જણાવ્યું કે તેની અને સલમાનની મુલાકાત એક પાર્ટીમાં થઈ હતી અને બાદમાં તેમની મિત્રતા થઈ હતી. સલમાને ડ્રગ્સનો સપ્લાય શરૂ કર્યો અને ધીમે-ધીમે આદિલ તેનો રેગ્યુલર ગ્રાહક બની ગયો હતો. જો કે, આ સિવાય તેણે આ રેકેટ કે હેરફેરમાં કોઈપણ પ્રકારની સંડોવણી હોવાનું નકાર્યું છે. જો કે, પોલીસે હજી સુધી તેને ક્લિનચીટ આપી નથી.

રેસ્ટોરાં ઉપરાંત આદિલ પિતા સલીમ નૂરાનીને હોટેલો અને પેટ્રોલ પંપ ચલાવવામાં મદદ કરે છે. નૂરાની પરિવારની એક હોટલ અને રેસ્ટોરાં કડોદરા હાઈવે પર છે તેમજ કડોદરા અને કતારગામમાં પેટ્રોલ પંપ ઉપરાંત સુરત-કડોદરા રોડ પર વે-બ્રીજ તેમની માલિકીનો છે. પોલીસે કહ્યું, "અમને શંકા છે કે, મુંબઈમાં પણ તેની ઓળખાણો હશે જ્યાંથી તે ડ્રગ્સ લાવતો હતો." સ્થાનિક કોર્ટે આદિલના રવિવાર સુધીના રિમાન્ડ મંજૂર કર્યા છે માટે તે પોલીસ કસ્ટડીમાં રહેશે.

સલમાનની ધરપકડ બાદ 22 વર્ષીય સંકેત અસલાલિયાને પણ ઝડપી લેવાયો છે. સંકેત સાયોના પ્લાઝા શોપિંગ સેન્ટરમાં આવેલી દુકાનમાં ઓનલાઈન ગાર્મેન્ટ્સનો બિઝનેસ કરે છે. તેની પાસેથી 30 લાખની કિંમતનું 304.98 ગ્રામ મેફેડ્રોન જપ્ત કરવામાં આવ્યું હતું. સંકેત અને સલમાન ભાગીદારીમાં પ્રતિબંધિત ડ્રગ્સ વેચતા હતા. આ ઉપરાંત પોલીસે વરાછાના પ્રજ્ઞેશ ઠુમ્મર અને વાપીથી મનોજકુમાર ભગતની ધરપકડ પણ કરી છે. સંકેત અને પ્રજ્ઞેશે દાવો કર્યો છે કે, તેઓ કડોદરામાં ભાડે લીધેલા એક રૂમમાં મેફેડ્રોન ડ્રગ બનાવતા હતા. સલમાનને 400 ગ્રામ મેફેડ્રોન ડ્રગ સપ્લાય કરવાના ગુનામાં મનોજકુમારની ધરપકડ કરવામાં આવી છે.

આરોપ પ્રમાણે, પ્રજ્ઞેશ ઠુમ્મરે સંકેતને મેફેડ્રોન ડ્રગ બનાવતા શીખવ્યું હતું. પ્રજ્ઞેશ વિવિધ કેમિકલ યુનિટ્સમાંથી જરૂરી સામગ્રી લાવી આપતો હતો અને તૈયાર થયેલો માલ કેવી રીતે વેચવો તે શીખવતો હતો. યુવાન છોકરીઓ સાથે નામ બદલીને સલમાન તેમની સાથે મિત્રતા કરતો હતો અને પછી તેમને મેફેડ્રોનના બંધાણી બનાવતો હતો. સલમાન પર યુવાન છોકરીઓનું યૌન શોષણ કરવાનો પણ આરોપ છે.