TRBના જવાન વાહનચાલકને રોકી દસ્તાવેજ માગી શકે? સુરતનો વિડીયો વાયરલ થતાં બબાલ

સુરત: ટીઆરબીના જવાનોનું કામ આમ તો ટ્રાફિક પોલીસને મદદ કરવાનું હોય છે. જો કે સુરતમાં એક યા બીજા કારણોસર ટીઆરબી જવાનોની કરતૂત સતત ચર્ચાનો વિષય બની રહી છે. હજુ થોડા સમય પહેલા જ બે ટીઆરબી જવાનોએ એક બાઈકવાળા પર દાદાગીરી કર્યાનો વિડીયો વાયરલ થયો હતો. ત્યારે હવે શહેરના મજૂરા ગેટ વિસ્તારમાં હવે ટીઆરબીના જવાનો વાહનચાલકોને અટકાવી તેમની પાસેથી દસ્તાવેજ માગી પજવણી કરતા હોવાનો વિડીયો વાયરલ થયો છે. આ વિડીયો 9 સપ્ટેમ્બરનો હોવાનું કહેવાઈ રહ્યું છે.

સુરત પોલીસે હાલ હેલ્મેટ વિના નીકળતા લોકોને પકડીને તેમને દંડ ફટકારવા માટે ડ્રાઈવ શરુ કરી છે. જો કે આ ડ્રાઈવ અંતર્ગત ટીઆરબીના જવાનો પણ વાહનચાલકોને અટકાવીને તેમની પાસેથી કાગળીયા માગી રહ્યા છે. એટલું જ નહીં, જો કોઈ વાહનચાલક વાંક-ગુનામાં હોય તો તેની પાસેથી પૈસા પડાવાઈ રહ્યા હોવાના પણ આક્ષેપ જનતા કરી રહી છે. મોટાભાગે તો ટીઆરબીના જવાનો હેલ્મેટના નિયમનો ખૌફ બતાવી લોકોની પજવણી કરતી હોવાના આક્ષેપ થઈ રહ્યા છે.

ઉલ્લેખનીય છે કે હેલ્મેટ ના પહેર્યું હોય તો 500 રુપિયાનો દંડ ભરવો પડે છે. જો કે દંડ કરવાની સત્તા માત્ર ટ્રાફિક પોલીસને છે. નિયમો અનુસાર ટીઆરબીના જવાનો કોઈની પાસેથી દંડ નથી વસૂલી શકતા, કે ના તો તેમની પાસે મેમો બુક હોય છે. તેવામાં કડક કાયદાનો ગેરલાભ લઈને હેલ્મેટ ના પહેર્યું હોય તેવા વાહનચાલકો પાસેથી પૈસા પડાવતા હોવાના આક્ષેપ થઈ રહ્યા છે.

ટીઆરબીના જવાનોની ગેરવર્તણૂંકના વિડીયો વાયરલ થતાં સુરત શહેર પોલીસે હજુ ગયા સપ્તાહે જ ટીઆરબીના જવાનોના કામકાજ અંગેના નિયમો કડક બનાવ્યા છે. સુરતમાં હાલ 1486 ટીઆરબી જવાન છે, અને તેઓ ટ્રાફિક એજ્યુકેશન ટ્રસ્ટ હેઠળ કામ કરે છે. જો કે તેમના પર ગેરકાયદે રીતે લોકોને દંડ ફટકારવાના અને પૈસા પડાવવાના આરોપ મૂકાઈ ચૂક્યા છે.

સુરતના 78 વર્ષીય નિવૃત્ત બેંકર હસમુખ મોદીએ આરટીઆઈ ફાઈલ કરી ટીઆરબીના જવાનોના કામકાજને લગતા નિયમોનો હવાલો માગ્યો હતો. તેમને કઈ સત્તા અપાઈ છે તેની પણ વિગતો આ આરટીઆઈમાં મગાઈ હતી. જો કે તેના જવાબમાં સિટી ટ્રાફિક પોલીસના જાહેર માહિતી અધિકારીએ કહ્યું હતું કે આ અંગેની કોઈ માહિતી રેકોર્ડ પર ઉપલબ્ધ નથી. પોલીસે આપેલો આ જવાબ સુરતમાં ચર્ચાનો વિષય બન્યા બાદ હજુ ગયા સપ્તાહે જ ટ્રાફિક પોલીસ દ્વારા આ અંગેના નિયમો ઘડવામાં આવ્યા છે. જો કે કડક નિયમોની કોઈ અસર ટીઆરબીના જવાનો પર પડી હોય તેવું હાલ તો નથી લાગી રહ્યું.