મહિલા કોન્સ્ટેબલને 'એ મસ્ત આઈટમ..' કહીને ભાગેલા બે લફંગાને સુરત પોલીસે પાઠ ભણાવ્યો

સુરત: પોલીસનો જાણે કોઈ ડર જ ના હોય તેવી કરતૂત કરીને ભાગેલા બે લબરમૂછિયાને પોલીસે પકડીને બરાબરનો પાઠ ભણાવ્યો છે. બંને ન્યૂ યરની રાતે સુરતના પુણા વિસ્તારમાં આવેલા રેશ્મા રો હાઉસ બ્રિજ નીચે બંદોબસ્તમાં તૈનાત એક મહિલા કોન્સ્ટેબલને 'એ મસ્ત આઈટમ, તું મેરા ક્યા ઉખાડ લેગી..' કહીને ભાગ્યા હતા.

સમગ્ર ઘટનાની વિગત એવી છે કે, સુરત શહેર પોલીસમાં લોકરક્ષક તરીકે ફરજ બજાવતા અસ્મિત પ્રશાંતભાઈ ન્યૂ યરના દિવસે રેશ્મા રો હાઉસ બ્રિજ નીચે બંદોબસ્તમાં તૈનાત હતાં. તેમની સાથે એએસઆઈ ભૂમિબેન તેમજ કોન્સ્ટેબલ ગોપાલ પણ બંદોબસ્તની ડ્યૂટી કરી રહ્યાં હતાં. તેવામાં રાત્રે દસેક વાગ્યે બે યુવાનો એક્ટિવા પર આવી રહ્યા હતા, જેમને રોકવા માટે પોલીસે તેમને વાહન રોકવા માટે ઈશારો કર્યો હતો.

પોલીસને જોતા જ આ બંને યુવકો લોકરક્ષક અસ્મિતાબેનની નજીક વાહન લઈને આવી ગયા હતા, અને તે વખતે પાછળ બેઠેલા યુવકે 'એ મસ્ત આઈટમ, તું મેરા ક્યા ઉખાડ લેગી...'એમ કહી ચિયિયારી પાડી હતી. આ ઘટના બાદ બંને યુવકો એક્ટિવાને પૂરપાટ ભગાવીને પુણા પાટીયા તરફ ભાગી ગયા હતા.

બંને યુવકોને રોકવા માટે ફરજ પર તૈનાત કોન્સ્ટેબલ ગોપાલે બાઈક પર તેમનો પીછો કર્યો હતો, પરંતુ યુવકો ભાગી જવામાં સફળ રહ્યા હતા. પરંતુ થોડીવારમાં આ જ યુવકો ફરી તે જ જગ્યાએ આવ્યા હતા, અને ફરી અસ્મિતાબેન સામે જોઈને ચીસો પાડી હતી, અને ભાગી ગયા હતા. આ વખતે કોન્સ્ટેબલ અને મહિલા એએસઆઈ બંને તેમની પાછળ પડ્યા હતા, અને પુણાના પીઆઈને તેની જાણ થતાં તેમણે પણ પીછો શરુ કર્યો હતો.

મહિલા લોકરક્ષકની છેડતી કરીને ભાગેલા આ યુવકોને પકડવા પોલીસે અડધી રાતે દોડધામ કર્યા બાદ બંને આખરે સિદ્ધિશ્વર સોસાયટી પાસે પકડાઈ ગયા હતા. આ મામલે મહિલા લોકરક્ષકની ફરિયાદના આધારે પોલીસે જીતુસિંહ (ઉં.22 વર્ષ) અને ગોવિંદ મેઘવાલ (ઉં. 18 વર્ષ)નામના બે યુવકોની ધરપડક કરી છે. બંને મૂળ રાજસ્થાનના હોવાનું પણ જાણવા મળ્યું છે.