લોકડાઉનમાં કામ બંધ થયું તો અમદાવાદની યુવતી બહેનપણી સાથે દારુની ખેપ મારવા લાગી

કોરોના વાયરસના કારણે સમગ્ર દેશમાં હાલમાં મંદી ચાલી રહી છે. ઘણા લોકોના રોજગાર છીનવાઈ ગયા છે અને વેપાર-ધંધાને ઘણી માઠી અસર પહોંચી છે. તેવામાં આવક મેળવવા માટે લોકો ખોટા રસ્તાઓનો ઉપયોગ કરી રહ્યા છે. તેવામાં ફોટોગ્રાફીનો ધંધો ઠપ થતાં કારમાં દારૂની ખેપ મારવા નીકળેલી બે યુવતી ઝડપાઈ ગઈ છે.

વલસાડ એલસીબી એ સોમવારે રાત્રે બામીના આધારે અતુલ નજીક હાઈવે પર નાકાબંધી કરી હતી. નાકાબંધી દરમિયાન પોલીસને જે બાતમી મળી હતી તે કાર ત્યાં આવી પહોંચી હતી. કાર આવતા જ પોલીસે તેને અટકાવી દીધી હતી. પોલીસે જોયું તો કારમાં બે યુવતીઓ હતી. તેથી પોલીસને થોડું આશ્ચર્ય ચોક્કસથી થયું હતું.

જોકે, પોલીસને યોગ્ય બાતમી મળી હોવાથી પોલીસે કારની તલાશી લીધી હતી અને તેમાંથી 31,200 રૂપિયાની દારૂની 216 બોટલ મળી આવી હતી. તેમાંથી એક યુવતી અમદાવાદની છે જ્યારે બીજી યુવતી જામનગરની છે. પોલીસે કરેલી પૂછપરછમાં જાણવા મળ્યું હતું કે અમદાવાદની યુવતી ફોટોગ્રાફીનો વ્યવસાય કરે છે અને થોડા સમયથી અન્ય યુવતી તેની સાથે જ રહેતી હતી.

પરંતુ લોકડાઉનના કારણે ફોટોગ્રાફીનો તેનો વ્યવસાય ઠપ થઈ ગયો હતો અને તે આર્થિક ભીંસમાં આવી ગઈ હતી. ઘરની જરૂરીયાતની વસ્તુઓ અને કારના હપ્તા ચૂકવવામાં મુશ્કેલી નડતા તેમણે દારૂની ખેપ મારીને રૂપિયા કમાવવાનું નક્કી કર્યું હતું. જે મુજબ બંનેએ મહારાષ્ટ્રથી દારૂ લાવીને અમદાવાદ વેચવાની યોજના બનાવી હતી.

પોલીસે જ્યારે બંનેને વાત સાંભળી તો તેમને પણ આઘાત લાગ્યો હતો. પરંતુ બંને યુવતીઓએ ગુનો કર્યો હતો એટલે પોલીસે જરૂરી કાર્યવાહી હાથ ધરી હતી. પોલીસે દારૂના જથ્થા સાથે ઝડપાયેલી બંને યુવતીઓ સામે દારૂની હેરફેરનો કેસ કર્યો છે.