ઓનલાઈન અભ્યાસ માટે મોબાઈલ નહીં મળતા ધોરણ 10ની વિદ્યાર્થિનીએ જીવન ટૂંકાવ્યું

સુરત: ઓનલાઈન ક્લાસમાં હાજરી નહીં આપી શકતા સુરતના પાંડેસરા વિસ્તારમાં રહેતી ધોરણ 10ની વિદ્યાર્થિનીએ જીવન ટૂંકાવ્યું હોવાનું જાણવા મળ્યું છે. ડિસેન્ટ હાઈસ્કૂલમાં અભ્યાસ કરતી 14 વર્ષીય આકાંક્ષા તિવારી નામની આ વિદ્યાર્થિનીના ઘરમાં માત્ર એક જ સ્માર્ટફોન હતો કે જેનો ઉપયોગ તેના પિતા કરતા હતા. આ કારણે તે વિદ્યાર્થિનીને ઓનલાઈન ક્લાસમાં હાજરી આપવામાં મુશ્કેલીનો સામનો કરવો પડી રહ્યો હતો.

ધોરણ 10માં અભ્યાસ કરતી 14 વર્ષીય આકાંક્ષા તિવારી નામની આ વિદ્યાર્થિનીએ તેના ઘરમાં આપઘાત કરી લીધો છે. પોલીસે આકાંક્ષા તિવારીની બૉડીને પોસ્ટમોર્ટમ માટે મોકલી આપી છે અને પ્રાથમિક તપાસમાં એવું જાણવા મળ્યું છે કે તેણે આપઘાત કરી લેતા તેનું મોત નીપજ્યું છે.

પ્રાપ્ત માહિતી મુજબ શનિવારે આકાંક્ષા તેની માતાની સાથે સ્કૂલે ગઈ હતી. આ દરમિયાન તેણે શિક્ષકોને જણાવ્યું હતું કે તે ઓનલાઈન ક્લાસમાં હાજરી આપી શકતી નથી કારણકે તેની પાસે ઓનલાઈન અભ્યાસ માટેનું કોઈ માધ્યમ નથી. આકાંક્ષાના પિતા ટેમ્પો ડ્રાઈવર તરીકેનું કામ કરે છે અને એકમાત્ર તેમની પાસે સ્માર્ટફોન છે. પણ, તેઓ આખો દિવસ ઘરની બહાર હોય છે અને આ દરમિયાન તેઓ આ સ્માર્ટફોન પોતાની સાથે રાખે છે.

આ વિદ્યાર્થિનીના પરિવારે પોલીસને જણાવ્યું કે તે લોકડાઉન દરમિયાન ઓનલાઈન અભ્યાસ કરી શકી નહોતી માટે તે ચિંતામાં રહેતી હતી. આવા સંજોગોમાં તે સતત માનસિક તણાવ અનુભવતી હતી. આ કારણે તેણે અંતિમ પગલું ભર્યું હોવાની શક્યતા છે.