પુણાગામમાં અતિભારે વરસાદથી ગટરો ઉભરાઈ, પોલીસ સ્ટેશનમાં પાણી ફરી વળ્યા

સુરતઃ સુરતમાં ભારે વરસાદના લીધે પુણાગામની સ્થિતિ ભયજનક બની છે. અહીં પહેલીવાર ભારે વરસાદના કારણે પોલીસ સ્ટેશનની અંદર પાણી ફરી વળ્યા છે. ભારે વરસાદના કારણે જનજીવન પર માઠી અસર પડી રહી છે. રસ્તાઓ પર પાણી ફરી વળ્યા છે જેના કારણે વાહનો દોડાવવા મુશ્કેલ બન્યા છે. વરસાદ સતત ચાલુ હોવાના કારણે ધીમે-ધીમે જળસ્તરમાં સતત વધારો થઈ રહ્યો છે. આ સાથે હવે લોકોને પોતાના ઘરમાં પણ પાણી ઘૂસવાનો ભય સતાવી રહ્યો છે. અહીં સ્થિતિ સમય જતા વધારે કપરી બની રહી છે. બીજી તરફ હવામાન વિભાગ દ્વારા સુરતમાં આગામી સમયમાં ભારેથી અતિભારે વરસાદની આગાહી વ્યક્ત કરવામાં આવી છે.

પુણાગામમાં ચારે તરફ પાણી જ પાણી દેખાઈ રહ્યા છે. ભારે વરસાદના કારણે રસ્તાઓ પર નદીઓ અને નાળા જેવી સ્થિતિનું નિર્માણ થયું છે. લોકો પોતાના ઘરમાં પાણી ના ઘૂસે તે માટેના પ્રયાસો કરી રહ્યા છે.

ભારે વરસાદ અને પાણી ભરાવાના લીધે અહીંની ગટરો પણ ઉભરાઈ રહી છે. ગટરમાંથી બહાર નીકળીને ગંદકી પાણીમાં ભળવાથી રોગચાળો ફેલાવાનો ભય સ્થાનિકોને સતાવી રહ્યો છે. બીજી તરફ લોકો પોતાની જરુરી ખરવખરીને ઘરમાં ઊંચાઈવાળી જગ્યાઓ પર મૂકી રહ્યા છે જેથી કરીને વરસાદના પાણી ઘરમાં આવી જાય તો નુકસાન ઓછું થાય.

અહીં પુણાગામમાં આવેલું પોલીસ સ્ટેશન પણ પાણીમાં ગરકાવ થઈ ગયું છે. પોલીસ સ્ટેશનની અંદર પાણી ફરી વળવાના કારણે કમ્યુટર સહિત જરુરી ફાઈલો અને દસ્તાવેજોને સુરક્ષિત કરવાનો પ્રયાસ કરવામાં આવી રહ્યો છે.