બસ આગ દુર્ઘટના: ગોવામાં હનીમૂન બાદ પતિ સાથે ભાવનગર જતી પરિણીતાનું સુરતમાં મોત

સુરત: શહેરના હીરાબાગ સર્કલ પાસે મંગળવારે રાતે બનેલી ગોઝારી ઘટનામાં બે લોકોના કમકમાટીભર્યા મોત થયા છે. પ્રાપ્ત અહેવાલો અનુસાર મૃતકોમાં એક પરિણીતા પણ સામેલ છે જે પતિ સાથે ગોવામાં હનીમૂન મનાવ્યા બાદ પરત બસમાં સવાર થઈને ભાવનગર જઈ રહી હતી. જો કે, વિકરાળ આગ લાગ્યા બાદ પરિણીતા બસમાંથી બહાર ન નીકળી શકતાં જોતજોતામાં ભડથું થઈ ગઈ હતી. જ્યારે પતિને પણ ઈજાઓ થતાં સારવાર માટે હોસ્પિટલ ખસેડવામાં આવ્યો હતો. હાલ નવદંપતીની એક તસવીર પણ સોશિયલ મીડિયામાં વાયરલ થઈ છે.હન

પોલીસ સૂત્રો પાસેથી પ્રાપ્ત માહિતી અનુસાર હીરાબાગ સર્કલ પાસે બસમા એસીનુ કમ્પ્રેસર ફાટતા આગ લાગી હતી. જેમાં સવાર ભાવનગરનો રહેવાસી વિશાલ નવલાની (32) ચાલુ બસમાંથી નીચે કૂદી ગયો હોવાથી મોઢાના ભાગે ઈજા થઈ હતી, પરંતુ તેની પત્ની તાનિયા નવલાની (30) બસમાંથી કૂદી શકી ન હતી અને જોતજોતામાં તે આગની ઝપેટમાં આવી જતાં ત્યાં જ ભડથું થઈ ગઈ હતી.

પ્રાપ્ત અહેવાલો અનુસાર મૂળ ભાવનગરનું દંપતી લગ્ન બાદ ગોવા હનીમૂન પર ગયા હતા. ગોવાથી નવદંપતી ફ્લાઈટમાં સુરત આવ્યું હતું. જ્યાથી તેઓ બસ દ્વારા ભાવનગર જવા નીકળ્યા હતા. બસમાં તેમણે સીટ નંબર 25 અને 26 બૂક કરાવી હતી. સુરતની હોટલમાં ડિનર લીધા બાદ દંપતી બસમાં ચઢ્યુ હતું. પરંતુ હીરાબાગ સુધી પહોંચતા જ બસ આગ લાગી જતાં તાનિયા નવલાનીનુ મોત થયુ હતું. ઘટનાને પગલે પરિવારમાં શોકનું મોજું ફરી વળ્યું છે.

ઉલ્લેખનીય છે કે, વરાછાના હીરા બાગ વિસ્તારમાં મંગળવારે એક ખાનગી બસમાં અચાનક આગ લાગી હતી, જેમાં બે લોકોના ગંભીર રીતે દાઝી જવાને કારણે મોત થયા હતા. પ્રાપ્ત માહિતી અનુસાર ફાયર કંટ્રોલ રૂમને લગભગ 9.47 કલાકે કોલ આવ્યો હતો અને મુસાફરોને બહાર કાઢવા માટે બસના કાચ તોડી નાખવામાં આવ્યા હતા.
હીરા બાગમાં ખાનગી બસમાં લાગી ભયંકર આગ, બે લોકોનાં મોત
બસ રાજધાની ટ્રાવેલ્સની હતી જેની વરાછાના લંબે હનુમાન રોડ પર માતાવાડી ખાતે ઓફિસ છે. નોંધનીય છે કે, દરરોજ મોટી સંખ્યામાં ખાનગી અને સરકારી બસો સૌરાષ્ટ્ર, રાજસ્થાન, મધ્યપ્રદેશ અને મહારાષ્ટ્રના જુદા જુદા સ્થળોએ જાય છે. જેમાં રાત્રે નીકળતી મોટાભાગની બસો સ્લીપર કોચ હોય છે.