સુરતઃ મહિલા TRB જવાને ટેમ્પો ચાલક પાસેથી હપ્તો લીધો! વીડિયો વાઈરલ

સુરત ટ્રાફિક પોલીસ મદદ માટે મુકવામાં આવેલા TRB જવાન ફરી એકવાર વિવાદમાં આવ્યા છે. ટ્રાફિકના સંચાલન માટે ફરજ પર રાખવામા આવેલા મહિલા TRB જવાન ટેમ્પો ચાલક પાસે હપ્તાની વસૂલી કરતા હોવાનો વિવાદ સામે આવી રહ્યો છે. મહિલા TRB જવાનની કથિત હપ્તખોરીનો એક વીડિયો વાયરલ થયો છે. આ વીડિયો દ્વારા આક્ષેપ કરવામાં આવ્યો છે કે આ મહિલા TRB જવાને ટેમ્પો ચાલક પાસેથી પૈસા ઉઘરાવ્યા છે.

આ વાઈરલ વીડિયોમાં જોઈ શકાય છે કે મહિલા TRB જવાન ટેમ્પોની પાસે ઊભા છે. તેઓ આ ટેમ્પો ચાલક પાસેથી રૂપિયા લઈને પેન્ટની ખીસ્સામાં મૂકી દે છે. આ સમગ્ર ઘટના એક જાગૃત નાગરિક દ્વારા કેમેરામાં કેદ કરી લેવામાં આવી હતી. જેનો વીડિયો હવે વાઈરલ થઈ રહ્યો છે. રિપોર્ટ્સ મુજબ આ ઘટના સુરતના ભાથેના વિસ્તાર રોડ પર બની છે.

જોકે આ વીડિયો વાઇરલ થતા સુરત ટ્રાફિક પોલીસના ઉચ્ચ અધિકારી દોડતા થયા છે. વીડિયો સામે આવતા ફરી એક વાર TRB જવાનો વિવાદમાં આવતા આ મહિલા જવાન વિરુદ્ધ તાત્કાલિક અધિકારીઓ દ્વારા તપાસ આદેશ આપવામાં આવ્યા છે. જોકે આ વીડિયો વાઇરલ થયા પહેલા છેલ્લા કેટલાક સમયથી TRB જવાનો દ્વારા લોકો પાસેથી રૂપિયા પડાવા સાથે હપ્તાખોરીની ફરિયાદો ઉઠી હતી, હવે આ વીડિયો સામે આવતા લોકોની ફરિયાદો પણ સાચી હોવાનું પુરવાર થઈ રહ્યું છે.