ધોરણ-10ના છોકરા-છોકરીને ઓનલાઈન ક્લાસ વખતે આંખ મળી ગઈ, ભાગી ગયા

વડોદરાઃ કોરોનાના કારણે દેશમાં જાહેર કરાયેલા લોકડાઉન બાદ ઓનલાઈન કામગીરીને વધારે વેગ મળ્યો છે, આવામાં આખું વર્ષ પુરું થવા આવ્યું અને બાળકોની સ્કૂલો ખુલી ના હોવાથી તેમને પણ ઓનલાઈન ભણાવવામાં આવી રહ્યા છે. પરંતુ ઓનલાઈન ક્લાસના કારણે વિદ્યાર્થીઓ દુષણ તરફ આકર્ષિત થતા હોવાના પણ કિસ્સા બને છે. આવામાં ભણવા સિવાયની બાબતોમાં વિદ્યાર્થીઓનું ધ્યાન ખેંચાતું હોવાના બનાવો પણ બની રહ્યા છે. આજ રીતે વડોદરામાં એક ઘટના બની છે જેમાં ધોરણ-10માં ભણતા બે સગીર વચ્ચે પ્રેમ પાંગર્યા બાદ બન્ને ઘરેથી ભાગી ગયા છે. (પ્રતિકાત્મક તસવીર)

વડોદરાના સાવલી તાલુકામાં બનેલી ઘટના પ્રમાણે ધોરણ-10માં અભ્યાસ કરતી 15 વર્ષની સગીરા અને 17 વર્ષના છોકરો ઓનલાઈન ક્લાસ દ્વારા એક બીજાના સંપર્કમાં આવ્યા અને આ પછી બન્ને વચ્ચે લાંબી વાતો અને મેસેજથી પ્રેમાલાપ શરુ થયો હતો. છોકરો અને છોકરી એક જ ફળિયામાં રહેતા હોવાથી આ વાત મિત્રો સુધી પહોંચી ગઈ હતી અને પછી તે ઘરના સભ્યો સુધી પહોંચી ગઈ.

છોકરી અને છોકરાના વાલીઓને આ વાતની જાણ થતાં તેમણે સ્થિતિને કાબૂમાં કરવા માટે તેમની પાસેથી ફોન લઈ લીધા અને તેમનું બહાર નીકળવાનું પણ ઓછું કરાવી દીધું. આવામાં પ્રેમમાં પાગલ બનેલા છોકરા-છોકરીને પરિવારના લોકો વિલન જેવા લાગતા તેમણે ઘરેથી ભાગી જવાનું નક્કી કરી લીધું.

આંખ મળી ગયા બાદ ઘરે જાણ થતાં તેમના ફોન લઈ લેવામાં આવતા તેઓનો સપર્ક ઓછો થઈ ગયો હતો અને બન્નેએ ભાગી જવાનો પ્લાન બનાવ્યો અને મામલો પોલીસ સ્ટેશન સુધી પહોંચી ગયો.

સગીરાનું પ્રેમ પ્રકરણ જાહેર થયા બાદ માતા-પિતા દ્વારા તેના પર રાત દિવસ કડક વોચ રાખવામાં આવતી હતી. 3જી જાન્યુઆરીની રાત્રે બાથરુમ જવા માટે છોકરી ઉઠી અને પાછી આવીને સૂઈ ગઈ હતી. પરંતુ સવારે ઉઠીને જોયું તો તે ઘરમાં હતી જ નહીં, પોતાની દીકરી ના મળતા હાંફળોફાંફળો થયેલો પરિવાર ફળિયામાં રહેતા છોકરાના ઘરે તપાસ કરવા ગયા તો તે પણ ગાયબ હતો. આ પછી પરિવારે પોતાની દીકરીને ભગાડી જેવાની પોલીસ ફરિયાદ નોંધાવી છે. પોલીસ આ દિશામાં તપાસ કરી રહી છે.