VIDEO: વડોદરાના છાણી વિસ્તારમાં 5 માળની ઈમારત ધરાશાયી, એકનું મોત

વડોદરાઃ છાણી વિસ્તારમાં આવેલી 5 માળની જૂની ઈમારતનો એક સાઈડનો ભાગ તૂટી પડતા અફરા તફરીનો માહોલ સર્જાયો છે. પ્રાથમિક માહિતી મુજબ આ ઘટનામાં એક વ્યક્તિનું મોત અને 8થી વધુ લોકો દટાયા હોવાની શક્યતા છે. હાલમાં ફાયર બ્રિગેડ દ્વારા કાટમાળ હટાવી બચાવ કામગારી હાથ ધરી છે.સ્થાનિક ટીવી ચેનલોના અહેવાલ મુજબ L&T કંપનીની જૂની પાંચ માળની ઈમારતનો એક સાઈડનો ભાગ તૂટી પડ્યો હતો. હાલ ફાયરબ્રિગેડની 10 ગાડીઓ સહિત કોર્પોરેશનના અધિકારીઓ ઘટના સ્થળે પહોંચી બચાવ કામગારી હાથ ધરી છે. ઈજાગ્રસ્તોને સારવાર માટે હોસ્પિટલમાં ખસેડવામાં આવ્યા છે.સ્થાનિકો પાસેથી મળી રહેલા માહિતી મુજબ આ બિલ્ડિંગ છેલ્લા ઘણા સમયથી ખાલી પડી હતી. આ બિલ્ડિંગમાં રહેતા મજૂરો દટાયા હોવાની આશંકા વ્યક્ત કરવામાં આવી રહી છે.આ ઘટના બાદ એલ એન્ડ ટી કંપની દ્વારા નિવેદન જાહેર કરવામાં આવ્યું છે કે, ‘વડોદરામાં જૂની બિલ્ડિંગ તૂટી પડવાની ઘટના દુર્ભાગ્યપૂર્ણ છે. બિલ્ડિંગના ડિમોલિશનનો કોન્ટ્રાક્ટ M/S શિવ સ્ક્રેપ ટ્રેડર્સને આપવામાં આવ્યો હતો. અમને આશ્ચર્ય થાય છે કે કોન્ટ્રાક્ટરે નિર્ધારિત પ્રક્રિયાઓ અને કરારની શરતોનું પાલન કર્યા વગર જ ડિમોલિશન કાર્ય શરૂ કરી દીધું હતું. ઘટના બાદ બચાવ કાર્યમાં અમે અમારા સંસાધનો કામે લગાવ્યા. ઘટના અંગે તપાસ શરૂ કરી છે, ત્યાર બાદ યોગ્ય કાર્યવાહી કરવામાં આવશે.’