સયાજીબાગ પ્રાણી સંગ્રહાલયના 30 મહિનાના સિંહનું કિડની ફેલ થવાના કારણે મૃત્યુ

વડોદરા: શહેરના સયાજીબાગ પ્રાણી સંગ્રહાલયમાં એક યુવાન નર સિંહનું કિડની ફેલ થવાથી મોત થયું હતું. સમ્રાટ નામના 30 મહિનાના સિંહનું આકસ્મિક મૃત્યુથી પ્રાણી સંગ્રહાલયના પરિચારકો ચોંકી ગયા છે.

ઝૂ ક્યુરેટર પ્રત્યુષ પાટણકરે અમારા સહયોગી ટાઈમ્સ ઓફ ઈન્ડિયાને જણાવ્યું કે, સમ્રાટ સંપૂર્ણ સ્વસ્થ સ્થિતિમાં હતો. થોડા દિવસો પહેલા તેને નાની ઈજા થઈ હતી અને તેની એન્ટીબાયોટીક્સથી સારવાર કરવામાં આવી રહી હતી. જોકે, તેણે અચાનક ખાવાનું બંધ કરી દીધું અને બ્લડ ટેસ્ટ કરાવ્યા પછી અમને ખબર પડી કે સમ્રાટ ક્રોનિક કિડની ડિસીઝથી પીડિત હતો.

પાટણકરે વધુમાં જણાવ્યું કે, સમ્રાટ એક અઠવાડિયા પહેલા અચાનક બીમાર પડતાં તેને તાત્કાલિક આણંદ વેટરનરી હોસ્પિટલમાં સારવાર માટે ખસેડવામાં આવ્યો હતો. ગુરુવારે બપોરે તે ઢળી પડ્યો અને રોગથી મૃત્યુ પામ્યો, જેનાથી સમગ્ર સ્ટાફ આઘાતમાં છે. પાટણકરે જણાવ્યું હતું કે તેમના ઘણા પરિચારકોએ ભોજન લેવાની પણ ના પાડી દીધી છે.

ગયા વર્ષે નવેમ્બરમાં પ્રાણી સંગ્રહાલયમાં 13 વર્ષની સિંહણનું કિડની ફેલ થવાને કારણે મોત થયું હતું. તેણીને પણ ચહેરા પર ઇજાઓ થઈ હતી અને તેની સર્જરી કરવામાં આવી હતી પરંતુ તેણીના તબીબી પરીક્ષણો બાદમાં જાણવા મળ્યું હતું કે તેણીનું ક્રિએટિનાઇનનું સ્તર ઊંચું હતું.

મળતી માહિતી અનુસાર સમ્રાટને જૂનાગઢ પ્રાણી સંગ્રહાલયમાંથી ગયા વર્ષે ડિસેમ્બરમાં સિંહણ સમૃદ્ધિ સાથે સયાજીબાગ પ્રાણી સંગ્રહાલયમાં લાવવામાં આવ્યો હતો. થોડા મહિનાઓ સુધી તેમને અલગ રાખ્યા પછી કપલને એકસાથે રાખવામાં આવ્યા. પ્રાણી સંગ્રહાલયના અધિકારીઓ આગામી વર્ષ સુધીમાં તેઓ સમાગમની અપેક્ષા રાખતા હતા. અમારે હવે નવો યુવાન સિંહ લાવવો પડશે. પાટણકરે જણાવ્યું હતું કે, ઝૂમાં કુંવર નામના 14 વર્ષના સિંહનું ઘર પણ છે.

આ વર્ષે ફેબ્રુઆરીમાં સયાજીબાગ પ્રાણી સંગ્રહાલયમાં 13 સાંભર હરણ પગ અને મોંની બીમારીને કારણે મૃત્યુ પામ્યા હતા. પ્રાણી સંગ્રહાલયના અધિકારીઓએ જણાવ્યું કે તેમને આપવામાં આવેલા ચારામાંથી ચેપ લાગ્યો હતો.