એક જ દિવસમાં 34,000 લોકોએ લીધી સ્ટેચ્યુ ઓફ યુનિટીની મુલાકાત, તૂટ્યા બધા રેકોર્ડ

નર્મદા જિલ્લામાં સ્થિત સરદાર પટેલની પ્રતિમા સ્ટેચ્યુ ઓફ યુનિટીની મુલાકાતે રવિવારના દિવસે કુલ 34,000 લોકો આવ્યા હતા. આ અત્યાર સુધીમાં સ્ટેચ્યુ ઓફ યુનિટીની મુલાકાતે આવેલા પ્રવાસીઓની સૌથી મોટી સંખ્યા છે. શનિવારે જન્માષ્ટમીના દિવસે 31,700 લોકો પહોંચ્યા હતા. જેથી દિવાળીના દિવસે આવેલા 28,400 પ્રવાસીઓના મુલાકાતનો રેકોર્ડ તૂટી ગયો હતો. રવિવારે 34,000 પ્રવાસીઓ પહોંચતા બધા જૂના રેકોર્ડ તૂટી ગયા હતા. આમ બે દિવસમાં 55 હજાર જેટલા પ્રવાસીઓ મુલાકાતે આવ્યા હતા. આ બે દિવસોમાં રેકોર્ડ બ્રેક મુલાકાતીઓ પહોંચવાથી સરદાર પટેલ રાષ્ટ્રીય એકતા ટ્રસ્ટને કુલ 1 કરોડ રૂપિયાની કમાણી થઈ હતી. પ્રવાસીઓની ભારે ભીડના કારણે ટિકિટ બારીઓ ખુલવાના થોડા જ સમયમાં વેચાણ થઈ જતું હતું. એક સમયે માત્ર 1000 રૂપિયાની એક્સપ્રેસ ટિકિટો જ ઉપલદબ્ધ હતી. આ કારણે ઘણા પ્રવાસીઓ અટવાઈ ગયા હતા. ઉલ્લેખનીય છે કે સ્ટેચ્યુ ઓફ યુનિટી 182 મીટર ઊંચી વિશ્વની સૌથી ઊંચી પ્રતિમા છે. ઓક્ટોબર 2018માં તેનું ઉદ્ધાટન કરવામાં આવ્યું હતું. રોજ અહીં અંદાજિત 15થી 20 હજાર જેટલા મુલાકાતીઓ આવતા હોય છે, જેના દ્વારા સરદાર પટેલ રાષ્ટ્રીય એકતા ટ્રસ્ટને સારી એવી કમાણી થતી હોય છે.