વડોદરાઃ ક્લેઈમ ચૂકવવામાં બહાના કાઢતી ઈન્શ્યોરન્સ કંપનીને ગ્રાહક કોર્ટનો 'તમાચો'

વડોદરાઃ જો ઘરની આવક વધારવા માટે છોકરો પિતાના બિઝનેસમાં મદદ કરતો હોય તો તે તેમના પર નિર્ભર કહેવાય. એક કેસના સંદર્ભમાં ગ્રાહક કોર્ટે નેશનલ ઈન્શ્યોરન્સ કંપની લિમિટેડને આદેશ આપ્યો કે તે 19 વર્ષના વિશાલ પ્રજાપતિના નામના યુવકની 2017માં થયેલી સ્વાદુપિંડ અને કિડની સંબંધિત બીમારીની ટ્રિટમેન્ટનું બિલ ચૂકવે. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો: વિશાલ વડોદરાના સાવલીનો રહેવાસી છે અને તેને પેટમાં દુઃખાવાની તકલીફ બાદ સંગમ ક્રોસરોડ નજીકની હોસ્પિટલમાં એડમિટ કરાયો હતો. થોડી સારવાર બાદ તેને સ્વાદુપિંડ અને કિડની સંબંધી બીમારીની સારવાર માટે અન્ય હોસ્પિટલમાં એડમિટ કરાયો. તેને ડિસ્ચાર્જ કરાયા બાદ 13 ઓગસ્ટ 2017એ વિશાલના પિતા અરવિંદ પ્રજાપતિએ ઈન્શ્યોરન્સ કંપનીમાં મેડિકલ સારવારનું 86,279 રૂપિયાનું બિલ ક્લેઈમ કરવા મૂક્યું. જોકે બે મહિના બાદ કંપનીએ ક્લેઈમને રિજેક્ટ કરતા જણાવ્યું કે ઈન્શ્યોરન્સ રેગ્યુલેટરી એન્ડ ડેવલપમેન્ટ ઓથોરિટીની ગાઈડલાઈન્સ અનુસાર પ્રજાપતિ 18 વર્ષથી ઓછી ઉંમરનો નિર્ભર છોકરો નથી અને ના તો તે વિદ્યાર્થી છે. પરંતુ વિશાલ કોઈ પૈસા કમાતો ન હોઈ કે ઈન્કમ ટેક્સ રિટર્ન પણ ન ભરતો હોઈ તેના પિતા અરવિંદે વડોદરા જિલ્લાની ગ્રાહક કોર્ટમાં ફરિયાદ કરીને વ્યાજ સાથે રકમ અને 15,000 રૂપિયા વધારાનું વળતર માગ્યું હતું. ગ્રાહક કોર્ટે અરવિંદની દલિલ સ્વીકારી જે મુજબ, તેનો દીકરો બિઝમેસમાં માત્ર મદદ કરે છે અને તેને આ બદલે કોઈ પગાર આપવામાં આવતો નથી. કોર્ટે તે પણ ધ્યાનમાં લીધું કે ઈન્શ્યોરન્સ કંપની વિશાલને કર્મચારી કે તેને મળતા પગાર વિશે કોઈ પૂરાવા રજૂ કરી શકી નથી. આથી કંપનીને 8 ટકા વ્યાજ સાથે ક્લેઈમની રકમ ચૂકવવાનો આદેશ અપાયો છે.