11 ચેક બાઉન્સ જતાં વડોદરાના કરિયાણાના વેપારીને 11 વર્ષની જેલની સજા

વડોદરા: ચેક બાઉન્સના કેસમાં અભૂતપૂર્વ ચુકાદો આપતા કોર્ટે શહેરના પ્રતાપનગરમાં કરિયાણાની દુકાન ધરાવતા વેપારીને 11 ચેક બાઉન્સ થવાના કિસ્સામાં 11 વર્ષની સજા ફટકારી છે. એડિશનલ ચીફ જ્યુડિશિયલ મેજિસ્ટ્રેટ જે.એ. બક્ષીએ ગુનેગાર જીતેન્દ્ર તહેલરામાનીને તેણે જે વ્યક્તિને આપેલા ચેક બાઉન્સ થયા હતા તેને તમામ ચેકના મૂલ્યની દોઢ ગણી રકમ ચૂકવવા પણ આદેશ કર્યો છે. આમ, તહેલરામાનીને ગોપાલ ટ્રેડર્સના વ્રજેશ શાહને 13.6 લાખ ચૂકવવાના રહેશે.

કોર્ટે એવી પણ સ્પષ્ટતા કરી છે કે તહેલરામાનીને એક ચેક બાઉન્સમાં એક વર્ષની સજા કાપવાની રહેશે. આમ, 11 ચેક બાઉન્સ થતાં તેને કુલ 11 વર્ષની સજા કાપવી પડશે. આ સજા એક-એક કરીને કાપવાની હોવાથી તહેલરામાનીને 11 વર્ષ સુધી જેલમાં રહેવું પડશે.

તહેલરામાનીએ 2014માં વ્રજેશ શાહને આપેલા 11 કેસ એક પછી એક બાઉન્સ થયા હતા. જે બદલ તેમણે પોતાના વકીલ અતુલ મિસ્ત્રી દ્વારા તહેલરામાની વિરુદ્ધ 11 જુદી-જુદી ફરિયાદો કરાવી હતી. વ્રજેશ શાહે સોજી, મેદો તેમજ બેસન જેવી વસ્તુઓ તહેલરામાનીને ઉધારમાં આપી હતી. જ્યારે તેમણે ઉઘરાણી કરી ત્યારે તહેલરામાનીએ જે રુપિયા તેમને આપવાના થતાં હતાં તેના ચેક આપ્યા હતા. આ તમામ 11 ચેક અલગ-અલગ રકમ તેમજ બેંકના હતા.

જોકે, તહેલરામાનીએ આપેલા આ તમામ ચેક બાઉન્સ થયા હતા. એટલું જ નહીં, તેણે કોર્ટમાં હાજર રહેવાનું પણ બંધ કરી દીધું હતું. કોર્ટે તેની ગેરહાજરીમાં જ વ્રજેશ શાહની તરફેણમાં ચુકાદો આપતા તહેલરામાનીને 13.6 લાખ રુપિયા બે મહિનામાં ચૂકવી દેવાનો આદેશ કર્યો છે. જો આમ કરવામાં તે નિષ્ફળ જાય તો તેને દરેક કેસમાં છ મહિનાની વધુ સજા ભોગવવાની રહેશે.