રોડની વચ્ચે અચાનક આવેલા શ્વાનને બચાવવા બ્રેક મારી, બાઈક સ્લિપ થઈ જતા એક યુવકે ગુમાવ્યો જીવ

વડોદરા શહેરમાં રખડતા પશુઓને કારણે અવારનવાર લોકોએ મુશ્કેલીનો સામનો કરવો પડતો હોય છે. રસ્તા પર રખડતા ઢોરને કારણે ઘણીવાર અકસ્માત થયા હોવાની ઘટનાઓ સામે આવે છે. અને તાજેતરમાં જ એક શ્વાનને કારણે યુવકે જીવ ગુમાવાવનો વારો આવ્યો છે. આ યુવક પોતાના મિત્ર સાથે બાઈક પર બેસીને જઈ રહ્યો હતો અને તે જ સમયે એકાએક શ્વાન સામે આવી જતા બાઈક સ્લિપ થઈ ગઈ હતી. યુવકને હોસ્પિટલ લઈ જવામાં આવ્યો હતો પરંતુ સારવાર મળે તે પહેલા જ તેણે અંતિમ શ્વાસ લીધા હતા.

નાનીના ગર્ભાશયથી જન્મ લેનારી નાનકડી 'રાધા' અનેક મહિલાઓ માટે બની આશાનું કિરણ
ઘટનાની વિગતવાર વાત કરવામાં આવે તો, વડોદરા શહેરમાં આવેલી વાઘોડિયા ચોકડી પાસે ખટંબા અર્બન રેસિડેન્સીમાં નિલેશ રમેશભાઈ રાજપૂત રહેતા હતા. 32 વર્ષીય નિલેશભાઈ વ્યવસાયે પ્લમ્બર હતા. સાતમી ઓક્ટોબરના રોજ સાંજના લગભગ સાડા છ વાગ્યે નિલેશ પ્લમ્બિંગના કામ માટે જ ઘરેથી નીકળ્યા હતા. ત્યારપછી રાતના લગભગ સવા નવ વાગ્યે મિત્ર સંજય કનુભાઈ રાજપૂત સાથે બાઈક લઈને વાઘોડિયા રોડ ઉમા ચાર રસ્તાથી કલાદર્શન થઈને ગાજરાબાડી તરફ તેઓ જઈ રહ્યા હતા.

ઉલ્લેખનીય છે કે મૃતક નિલેશનો મિત્ર સંજય બાઈક ચલાવી રહ્યો હતો. આ દરમિયાન એકાએક રોડની વચ્ચે શ્વાન આવી જતા સંજયે બ્રેક મારી હતી. અચાનક બ્રેક મારવાને કારણે તેમની બાઈક સ્લિપ થઈ ગઈ અને બન્ને મિત્રો રસ્તા પર ફંગોળાયા હતા. પાછળ બેઠેલા નિલેશને માથાના ભાગે ઈજા થઈ હતી. સંજય રાજપૂતે પોતાના ઈજાગ્રસ્ત મિત્રને હોસ્પિટલ લઈ જવામાં ઉતાવળ કરી હતી. તાત્કાલિક નિલેશને ખાનગી હોસ્પિટલમાં સારવાર માટે લઈ જવામાં આવ્યા હતા, પરંતુ સારવાર શરુ થાય તે પહેલા તો અંતિમ શ્વાસ લીધા હતા.

બાળપણમાં માતા-પિતા ગુમાવ્યા, જાતે જ તાલીમ મેળવી અને ભાલાફેંકમાં ગોલ્ડ મેડલ જીત્યો છોટા ઉદેપુરનો ભરત
અહીં નોંધનીય બાબત એ છે કે રસ્તા પર શ્વાન સામે આવવાને કારણે બાઈક સ્લિપ થઈ હોવા છતાં પોલીસે બાઈક ચલાવનારા સંજય રાજપૂત સામે ગુનો દાખલ કર્યો છે. આ સિવાય વડોદરા શહેરમાં રસ્તા પર ગાય આવી જવાને કારણે એક વિદ્યાર્થીએ આંખ ગુમાવી હોવાની ઘટના પણ સામે આવી છે. એન્જિનિયરિંગના વિદ્યાર્થીને ગાયને કારણે ઈજા થઈ હતી. પોલીસે ગાયના માલિક સામે ગુનો દાખલ કર્યો છે. હજી સુધી ગાયના માલિકની ધરપકડ થઈ શકી નથી. વડોદરાના નાગરિકોએ તંત્ર સમક્ષ અનેકવાર આ સમસ્યાનું નિરાકરણ લાવવાની માંગ કરી છે.

Read Latest Vadodara News And Gujarati News