22 વર્ષની કામવાળીએ લોન લેવાના ચક્કરમાં જ્યાં-ત્યાં સહીઓ કરી નાખી, વર્ષ પછી આંચકો લાગ્યો

વડોદરાઃ ઘરકામ કરીને પોતાનું અને પોતાની વૃદ્ધ માતાનું પેટ ભરતી મીના પરમારને ક્યારેય સપને પણ ખ્યાલ નહોતો કે તેના જીવનનું સૌથી મોટું સપનું આ રીતે દુસ્વપ્ન બનીને તેની સામે આવશે. ઘરકામ કરીને પેટીયું રળતી મીના દરરોજ તેની માતા સાથે કામ કરવા માટે પાદરાથી વડોદરા આવતી હતી તેનું સપનું હતું કે તેઓ એક ટુ વ્હિલર લઈ લે જેથી તેની માતા અને પોતે બંને તેના પર આવે જેના કારણે તેમનો સમય અને દરરોજ આવવા જવાનો થતો ખર્ચો બચાવી શકાય. તેનું આ સપનું પૂરું કરવા માટે કરજણના નિવાસી વિજય પરમારે મદદ કરવાનું વચન આપ્યું અને તેને લાગ્યું કે જાણે ભગવાને તેનું સાભળી લીધું

ઘટના 2017માં બની હતી વિજયે યુવતી પાસેથી લોન અપાવવાના નામે કેટલાક કાગળિયા પર સહીઓ કરાવી લીધી હતી. જોકે એકાદ વર્ષ પછી મીનાના પગ નીચેથી જમીન સરકી ગઈ જ્યારે તેને ખબર પડી કે તેની જાણ બહાર જ વિજય સાથે તેના લગ્નની નોંધણી થઈ ગઈ છે અને સત્તાવાર રીતે બંને પતિ-પત્ની છે. યુવતી ભણેલી ન હોવાથી તેને કાગળિયામાં ખાસ કંઈ ગતાગમ પડતી નહોતી જેના કારણે વિજયે તેની પાસે લોનના નામે લગ્ન નોંધણીના ફોર્મમાં સહીઓ કરાવી લીધી હતી.

જોકે યુવતી માટે સમસ્યા આટલેથી જ અટકતી નથી. તેણે પોતાની સાથે થયેલા આ ભયંકર છેતરપીંડીથી છૂટવા માટે કોર્ટમાં છૂટાછેડાની અરજી કરી હતી અને માગણી કરી હતી કે તેને વિજય સાથે છૂટાછેડા આપવામાં આવે પરંતુ કોર્ટે એ આધાર પર તેની અરજી નકારી કાઢી હતી કે યુવતી કોર્ટમાં સાબિત નથી કરી શકી કે વિજયે તેની સાચે છેતરપિંડી કરી છે. જેથી યુવતીની અરજી હિંદુ મેરેજ એક્ટના નિયમો મુજબ છૂટાછેડા આપવા માટે સંતોષકારક કારણ નથી દર્શાવી રહી જેથી કોર્ટ છૂટાછેડા આપી શકે નહીં.

મીના અને તેની માતાની વિજય સાથે મુલાકાત ઓક્ટોબર 2016માં એક લગ્નમાં થઈ હતી. જ્યાં તેણે પોતાને સરકારી લોન એજન્ટ તરીકે ઓળખાવ્યો હતો. આ સાથે જ તેણે મીનાને ખૂબ જ ઓછા વ્ચાજ દરે સ્કૂટર માટે લોન અપાવી દેવાની ખાતરી આપી હતી. ધીમે ધીમે મા-દીકરીને પોતાની વાતોની જાળમાં ફસાવીને તેમનો વિશ્વાસ જીતી લીધો હતો. જે બાદ નવેમ્બર 2017માં મીના વિજયને શહેરના જેલ રોડ પર આવેલ નર્મદા ભવન ખાતે મળી હતી જ્યાં તેણે યુવતી પાસે લોનના કાગળીયા હોવાનું કહીને સહીઓ અને અંગુઠા મરાવી લીધી હતા જોકે તે કાગળીયા લોનની જગ્યાએ લગ્ન નોંધણીના ફોર્મ હતા.

એટલું જ નહીં સમસ્યા ત્યારે વધી ગઈ છે જ્યારે વિજય ન તો મીનાને પ્રેમ કરે છે ન તો તેની સાથે રહેવા માગે છે. જેના કારણે યુવતી વધુ ફસાઈ ગઈ છે. મીના અને તેના પરિવારે વિજય અંગે તપાસ પણ કરી હતી પરંતુ વિજયના સંબંધીઓને પણ તે હાલ ક્યાં જતો રહ્યો છે તેના વિશે કોઈ ખબર નથી. આ સાથે યુવતીએ પોતાની અરજીમાં એમ પણ જણાવ્યું હતું કે પોલીસે તેની સાથે છેતરપિંડીની ફરિયાદ લખવાનું પણ ટાળી દીધું હતું.

જોકે કોર્ટમાં સુનાવણી દરમિયાન એડિ. સીનિયર સિવિલ જજ એસ.જી. ચાંચુએ મીનાની છૂટાછેડાની અરજીને ફગાવી દીધી હતી. જેનું કારણ આપતા કોર્ટે જણાવ્યું હતું કે હિંદુ મેરેજ એક્ટ અંતર્ગત છૂટાછેડા મેળવવા માટે મીના પાસે કોઈ કાયદા સંમત કારણ નથી તેમજ તેની સાથે ચીટિંગ થયાનું પણ તે કોર્ટમાં સાબિત કરી શકી નથી.

કોર્ટે આદેશમાં જણાવ્યું હતું કે, 'અરજદારે હિન્દુ લગ્ન અધિનિયમની કલમ 11 અને કલમ 5 હેઠળ લગ્નને રદ કરવાની માંગ કરી છે. પરંતુ તેની અરજીમાં તે હિન્દુ મેરેજ એક્ટની કલમ 5 મુજબ લગ્ન કર્યા હોવાનો ઇનકાર કરી રહી છે, તેથી કલમ 11 હેઠળ છૂટાછેડા મેળવવાને પાત્ર ઠરતી નથી અને તેમના લગ્ન રદ કરી શકાય તેમ નથી.” હિંદુ મેરેજ એક્ટની કલમ 11 એ હિંદુ લગ્નની એવી પરિસ્થિતિઓને સંદર્ભિત કરે છે જેમાં લગ્નને રદ કરવામાં આવી શકે જો કાયદાની કલમ 5 અંતર્ગત લગ્ન માટે બનાવામાં આવેલા નિયમોનું ઉલ્લંઘન કરવામાં આવ્યું હોય.

(પીડિત અને આરોપી બંનેના નામ બદલવામાં આવ્યા છે)