કોરોનાના કારણે સાઉન્ડ સિસ્ટમનો ધીકતો ધંધો ઠપ, વેપારી સેવ ઉસળ વેચવા મજબૂર

સચિન શર્મા, વડોદરા: ગોધરાના નિવાસી ઘનશ્યામ પટેલ પોતાની યાદશક્તિ અને કેલેન્ડરમાંથી 2020ના વર્ષને ભૂંસી નાખવા માગે છે. એક સમય હતો જ્યારે તેમને સાઉન્ડ સિસ્ટમનો બિઝનેસ ધમધોકાર ચાલતો હતો. પરંતુ કોવિડ-19ને તેમને રોડ પર હાથ લારી લઈને સેવ ઉસળ વેચવા મજબૂર કર્યા. આટલા વર્ષોમાં સાઉન્ડ સિસ્ટમના બિઝનેસમાં ઘનશ્યામ પટેલને ક્યારેય પાછું વળીને જોઉં નહોતું પડ્યું. આધ્યાત્મિક કાર્યક્રમો અને લગ્નોથી માંડીને ગણેશોત્સવ અને નવરાત્રી દરમિયાન તેમના સાઉન્ડ સિસ્ટમની ખૂબ માગ રહેતી હતી. આટલું જ નહીં રાજકીય પાર્ટીઓ અને નેતાઓ પણ તેમને સાઉન્ડ સિસ્ટમ માટે ઓર્ડર આપતા હતા.

પરંતુ માર્ચ મહિનો આવ્યો અને બધું જ બદલાઈ ગયું. ઘનશ્યામ પટેલે કહ્યું, "કોઈ મોટી ઈવેન્ટ યોજાઈ નથી. અત્યાર સુધી ઘણી છૂટછાટો અપાઈ છે પરંતુ તેનાથી મને કોઈ રીતે ફાયદો થયો નથી. સેવ ઉસળનો ધંધો પણ ખાસ ચાલતો નથી. લોકોએ લારીએ આવીને ખાતા ખચકાય છે એવામાં મને મોટાભાગે નુકસાન જ જાય છે. મેં આ વાનગી વડોદરામાં કોઈની પાસેથી બનાવતા શીખી હતી પરંતુ આનાથી પણ કોઈ મદદ નથી મળી રહી."

ઘનશ્યામ પટેલ માતા-પિતા સહિત આઠ સભ્યોના સંયુક્ત કુટુંબમાં રહે છે. ઘનશ્યામ પટેલના મતે તેમના ભાઈ નોકરી કરે છે પરંતુ તેમનો પગાર એટલો નથી કે પરિવારના રોજિંદા ખર્ચ ઉઠાવી શકે. ઘનશ્યામ પટેલના કહેવા મુજબ, તેમણે 55 લાખ રૂપિયા વિવિધ પ્રકારની સાઉન્ડ સિસ્ટમ પાછળ રોક્યા છે. સાધનો ખરીદવા માટે તેમણે બે જુદી-જુદી બેંકો પાસેથી લોન લીધી છે. "37 લાખ રૂપિયા ચૂકવવા છે, મને નથી ખબર આ રૂપિયા હું ક્યાંથી લાવીશ", તેમ ઘનશ્યામભાઈએ કહ્યું.

ઘનશ્યામ પટેલે સાઉન્ડ સિસ્ટમની ટેક્નિકલ બાબતો તેમના પિતા પાસેથી શીખી હતી, જેઓ આ વેપાર સાથે 1988થી જોડાયેલા છે. ઘનશ્યામ પટેલે કહ્યું, "એ વખતે અમારી પાસે સામાાન્ય સિસ્ટમ હતી. 2000ની સાલ પછી હું પણ આ બિઝનેસમાં જોડાયો અને વિવિધ સાધનો વસાવ્યા. મોટા સ્થળોએ યોજાતા લાઈવ ગરબામાં વપરાતી સાઉન્ડ સિસ્ટમ સહિતના સાધનો વસાવ્યા હતા."

ઘનશ્યામ પટેલના કહેવા મુજબ તેમને નવરાત્રી દરમિયાન 4 સ્થળોએથી ઓર્ડર મળતા હતા. જેમાંથી એકમાં લાઈવ પર્ફોર્મન્સ થતું જ્યારે બાકીના ત્રણમાં રેકોર્ડ કરેલું મ્યૂઝિક વાગતું હતું. આ વર્ષે સાઉન્ડ સિસ્ટમનો બિઝનેસ ઠપ છે અને કોઈ ઓર્ડર મળ્યા નથી. મોટા ગરબા આયોજનો પણ બંધ છે. ઘનશ્યામ પટેલે કહ્યું, "ગણેશોત્સવ બાદ આ બીજો તહેવાર એવો છે જેમાં ધંધો સાવ ધોવાઈ જશે."