હવે ફેફસાની તપાસ સરળ બની જશે, વડોદરાની મેડિકલ કોલેજના ડોક્ટરે તૈયાર કર્યું ખાસ પ્રકારનું જેકેટ

વડોદરા- મનુષ્યના ફેફસાની ક્ષમતા ચકાસવા માટે તબીબો અને ખાસ કરીને ચેસ્ટ સ્પેશિયાલિસ્ટ તબીબો Pulmonary Function Test(PFT) કરાવતા હોય છે. મેડિકલ કોલેજ બરોડાના એક ફેકલ્ટી દ્વારા કરવામાં આવેલી એક શોધની મદદથી આ ટેસ્ટ કરાવનારા દર્દીઓની સમસ્યામાં ઘટાડો થઈ જશે. મેડિકલ કોલેજના ફિઝિયોલોજી વિભાગના ડોક્ટર પ્રશાંદ રાજદીપે એક એવી ડિવાઈસ(જેકેટ)ની શોધ કરી છે જેના કારણે પીએફટી દરમિયાન દર્દીઓએ જે મહેનત કરવી પડે છે તેમાં ઘણો ઘટાડો થઈ જશે.

ડોક્ટર રાજદીપ જણાવે છે કે, મેડિકલ સાયન્સમાં દર્દીના ફેફસાની કામ કરવાની ક્ષમતા કેટલી છે અને તે કેટલા સ્વસ્થ છે તે તપાસવા માટે પીએફટી કરવામાં આવે છે. આ ટેસ્ટ દરમિયાન દર્દીએ પોતાની મહત્તમ ક્ષમતા સાથે શ્વાસ લેવાનો અને શ્વાસ બહાર કાઢવાનો હોય છે. પરંતુ આ ટેસ્ટ વ્યવસ્થિત થાય તે માટે મોટાભાગના દર્દીઓએ અનેક વાર આ પ્રયત્ન કરવો પડતો હોય છે. ઘણીવાર એવું બને છે કે જો આ શ્વાસ લેવાની અને બહાર કાઢવાની પ્રક્રિયા યોગ્ય રીતે ન થાય તો પરિણામ સચોટ નથી મળતા અને તબીબો નિદાન નથી કરી શકતા.

ગુજરાતમાંથી કોરોનાની વિદાય! નવા માત્ર 4 દર્દી, અમદાવાદમાં એકપણ કેસ નહીં
ડોક્ટર રાજદીપ દ્વારા તૈયાર કરવામાં આવેલા આ જેકેટને ભારત સરકાર દ્વારા પેટન્ટ કરવામાં આવ્યું છે. આ જેકેટની મદદથી ટેસ્ટ દરમિયાન દર્દીએ વધારે મહેનત કરવાની જરૂર નહીં રહે. જ્યારે પીએફટી ટેસ્ટ કરવાનો હોય ત્યારે દર્દીએ માત્ર આ જેકેટ પહેરવાનું રહેશે. ડોક્ટર રાજદીપ જણાવે છે કે, જેકેટમાં વિવિધ લેયર રાખવામાં આવ્યા છે. ઈન્સપિરેશન માટે ઉત્તેજક તરીકે ઠંડા પાણીનો ઉપયોગ કરવામાં આવશે અને એક્સપાઈરેશન માટે જેકેટમાં હવાનું દબાણ કરવામાં આવશે. જ્યારે કોઈ વ્યક્તિ પર ઠંડુ પાણી રેડવામાં આવે અને તે જે પ્રકારે હાંફે છે તે જ પદ્ધતિનો ઉપયોગ અહીં કરવામાં આવ્યો છે.


ડોક્ટર રાજદીપે વર્ષ 2014માં આ પદ્ધતિને પેટન્ટ કરવાની અરજી કરી હતી. તેઓ જણાવે છે કે, આ પદ્ધતિ દર્દીઓ માટે ઘણી ફાયદાકારક સાબિત થશે કારણકે અહીં તેમણે વધારે પ્રયત્નો કરવાના નથી રહેતા અને સાથે જ તે ડોક્ટરોનો પણ સમય અને ઉર્જા બન્ને બચાવશે. કારણકે ટેસ્ટ દરમિયાન તબીબોને શ્વાસ લેવા અને બહાર કાઢવાનું શીખવાડવું એક કપરું કામ હોય છે. હવે જ્યારે આ ટેક્નોલોજી પેટન્ટ થઈ ગઈ છે, ટૂંક સમયમાં તે વેચાણ માટે ઉપલબ્ધ હશે.