વડોદરાઃ માસ્કના દંડ બાબતે પૂર્વ સાંસદને લાફો મારનારા PSI સામે તપાસનો આદેશ

વડોદરાઃ અખિલ ભારતીય યુવક કોંગ્રેસના પૂર્વ અધ્યક્ષ અને વડોદરાના પૂર્વ સાંસદ સત્યજીત ગાયકવાડને માસ્કના દંડ ભરવા મુદ્દે પીએસઆઈ ડી.એસ. પટેલે લાફા ઝીંક્યા હોવાની ઘટના બુધવારે રાત્રે બની હતી. આ મામલે પોલીસ કમિશનરને રજુઆત બાદ ACPને તપાસ સોંપવામાં આવી છે. કોગ્રેંસ તરફથી પૂર્વ સાંસદ સામે દુર્વ્યવહાર કરનાર પીએસઆઈને સસ્પેન્ડ કરવાની માંગણી કરવામાં આવી છે.

પૂર્વ સાંસદ સત્યજીત ગાયકવાડના બહેન બુધવારે મોડી સાંજે ડ્રાઇવર સાથે કારમાં નીકળ્યા હતા. ત્યારે બગીખાના ત્રણ રસ્તા પાસે તેમનું માસ્ક નાક નીચે હોવાથી અટકાવી પોલીસે એક હજારનો દંડ ભરવો પડશે તેવી જાણ કરી હતી. જો કે તેઓ પર્સ લીધા વગર નીકળ્યા હોવાથી ભાઈ સત્યજિતનો મોબાઇલ પર સંપર્ક કરી 1000 રૂપિયા લઇ બગીખાના ત્રણ રસ્તા આવવા જાણ કરી હતી.

સત્યજીત ગાયકવાડ પૈસા લઈને બગીખાના ત્રણ રસ્તા પાસે પહોંચ્યા હતા. આ સમયે હાજર પોલીસે પાવતી પુરી થઇ હોવાથી નવાપુરા પોલીસ સ્ટેશન આવવા સૂચના આપી હતી. જેનો વિરોધ કરતા પીએસઆઈ પટેલે ઉદ્ધતાઇભર્યું વર્તનકરી સત્યજીત ગાયકવાડને બે લાફા ઝીકી દીધા હતા.

સત્યજીત ગાયકવાડે જણાવ્યું કે, પીએસઆઇ ડી.એસ. પટેલ મને કીધું કે પાવતી ફડાવો પછી વાત. પોલીસ વાળા પાસે પાવતી ન હોવાથી મેં પીએસઆઇને કહ્યું કે હું અહીંયા જ છું. તમે પાવતી લઈને આવો. મારા બહેનને જવા દો. આટલું કહેતા જ પોલીસવાળા મારી પર તૂટી પડ્યા હતા. મને ધક્કો મારી બે લાફા મારી દીધા હતા. ત્યાર બાદ પોલીસે પૂર્વ સાંસદના ઘરે જઈને કેસ કરીને વોન્ટેડ બતાવીશ તેવી ધમકી આપી હોવાના આક્ષેપ કરવામા આવ્યા હતા.

આ મામલે પૂર્વ સાંસદ સામે પીએસઆઈએ સ્ટેશન ડાયરીમાં નોંધ કરી સત્યજીત ગાયકવાડ પર ગાળાગાળી કરવા અને ઝપાઝપી કરવાનો આક્ષેપ કર્યો છે.