ડી.જી વણઝારાનો પુત્ર અર્જુન 75 હજારની લાંચ લેતા ઝડપાયો

નવગુજરાત સમય.કોમ, અમદાવાદ

પૂર્વ આઇપીએસ ડી.જી. વણઝારાનો પુત્ર અર્જુન વણઝારાને એન્ટી કરપ્શન બ્યૂરો(ACB)એ મંગળવારે 75 હજારની લાંચ લેતા ઝડપી પાડ્યો હતો. અર્જુન વણઝારા વડોદરા ગ્રામ્યમાં મામલતદાર તરીકે ફરજ બજાવે છે.

ગુજરાત સરકારમાં દિવસે ને દિવસે લાંચીયા અધિકારીઓના કરતૂતો સામે આવી રહ્યા છે. તેમાં આ વખતે એન્કાઉન્ટર કેસમાં બહુચર્ચિત નિવૃત આઇપીએસ ડી.જી. વણઝારાનો પુત્ર એસીબીના સંકજામાં આવ્યો છે. અર્જુન વણઝારા છેલ્લા ઘણા સમયથી વડોદરા ગ્રામ્ય મામલતદાર તરીકે ફરજ બજાવે છે. પ્રાપ્ત માહિતી અનુસાર અર્જુન વણઝારાએ જમીનની બોગસ એન્ટ્રી રદ્દ કરવા માટે એક લાખ રૂપિયાની લાંચની માગણી કરી હતી.

આ બાબતે ફરિયાદીએ એસીબીમાં જાણ કરતા એસીબીના અધિકારીઓ દ્વારા ટ્રેપ ગોઠવી અર્જુન વણઝારાને 75 હજારની લાંચ લેતા ઝડપી પાડ્યો હતો અને તેની સાથે નાયબ મામલતદાર જસવંતસિંહ હજુરની પણ એસીબીએ અટકાયત કરી હતી.