સાંસદ મનસુખ વસાવાએ કોર્પોરેટર સાથે ગાળાગાળી કરી, વિડીયો થયો વાયરલ

હાલમાં મુખ્યમંત્રી વિજય રૂપાણીએ ગુજરાતની વિવિધ નગરપાલિકાઓમાં 105 કરોડના વિકાસ કાર્યોનું ઈ-લોકાર્પણ કર્યું હતું. જેમાં રાજપીપળા નગરપાલિકાની રાજેન્દ્ર નગર સોસાયટીમાં રોડ પર પેવર બ્લોકના કામને મંજૂરી અપાઈ હતી. જોકે આ દરમિયાન સાંસદ અને કોર્પોરેટર વચ્ચે જોરદાર બબાલ થઈ ગઈ. પ્રજાના જનપ્રતિનિધિઓ વચ્ચે જાહેરમાં જ ગાળાગાળી થઈ ગઈ હતી. જેનો વિડીયો હોલમાં સોશિયલ મીડિયા પર વાઈરલ થઈ રહ્યો છે.

રાજપીપળાની રાજેન્દ્ર નગર સોસાયટીમાં પેવર બ્લોક બેસાડવાનું કામકાજ માટે નગરપાલિકાના પ્રમુખ તથા સાંસદ મનસુખ વસાવાની હાજરીમાં ખાત મહૂર્ત શરૂ કરવામાં આવ્યું હતું. જોકે વિસ્તારના રહીશો દ્વારા આ કામનો વિરોધ કરવામાં આવ્યો હતો. આ દરમિયાન રાજપીપળા નગરપાલિકાના કોર્પોરેટર મહેશ વસાવા પણ અચાનક કાર્યક્રમમાં પહોંચી ગયા હતા. તેમણે ચીફ ઓફિસરનો ઉધડો લીધો હતો કે, તમે અમને કાર્યક્રમમાં કેમ નથી બોલાવતા.


આ દરમિયાન કોર્પોરેટર મહેશ વસાવા અને સાંસદ મનસુખ વસાવા વચ્ચે ઉગ્ર બોલાચાલી થઈ ગઈ હતી. સાંસદ વસાવાએ કહ્યું કે, આ કામ મેં મંજૂર કરાવ્યું છે. ત્યારે કોર્પોરેટર મહેશ વસાવાએ જણાવ્યું હતું કે, બોર્ડમા લીધા વગર તમે આ કામ કેમ મંજૂર કરાવ્યું. આ મામલે સાંસદ મનસુખ વસાવા અને કોર્પોરેટર મહેશ વસાવા વચ્ચે ઉગ્ર બોલાચાલી પણ થઈ હતી. મામલે ત્યાં સુધી પહોંચ્યો કે બંને એકબીજા પર બળપ્રયોગ કરવા સુધી પહોંચી ગયા હતા. જોકે ત્યાં ઉપસ્થિત અન્ય આગેવાનોએ મામલો થાળે પાડ્યો હતો.

ઉલ્લેખનીય છે કે આ કાર્યક્રમમાં પેવર બ્લોક બેસાડવાના કામનો સમગ્ર રાજેન્દ્રનગર સોસાયટીના રહીશોએ વિરોધ કરી રહ્યા છે. જ્યારે સાંસદનું કહેવું છે કે, આ પેવર બ્લોક બેસાડવાથી સોસાયટીમાં જે ચોમાસા દરમિયાન પાણી ભરાય છે તે પાણી નહીં ભરાઈ અને સોસાયટી સ્વચ્છ થશે. જોકે આ બાબતે પાલિકા સદસ્ય મહેશ વસાવાએ પણ પોતાનો રોષ વ્યક્ત કર્યો હતો અને તેમણે જણાવ્યું હતું કે આ વિકાસ ના કામો ચૂંટણી લક્ષી છે.