બોયફ્રેન્ડ મોડીરાત સુધી રૂમમાં રોકાતા પેઈંગ ગેસ્ટમાં રહેતી 3 યુવતી વચ્ચે જોરદાર ઝઘડો

વડોદરા: પેઈંગ ગેસ્ટ તરીકે રહેતી યુવતીનો બોયફ્રેન્ડ મોડીરાત સુધી રૂમમાં રહેતો હોવાથી અન્ય બે યુવતીએ વાંધો ઉઠાવતા ઉગ્ર બોલાચાલી બાદ બબાલ થઈ હતી. પ્રાપ્ત માહિતી અનુસાર અન્ય બે યુવતીઓએ વિરોધ કરતા બોયફ્રેન્ડે તેમને ધાકધમકી આપી હતી. જેથી બંને યુવતીઓએ મહિલા અભયમની મદદ માગી હતી. ઘટનાસ્થળે પહોંચેલી અભયમની ટીમે યુવતીનું કાઉન્સેલિંગ કરતા તેણીએ તેના જ રૂમમાં રહેતી અન્ય બે યુવતીની માફી માંગી હતી, અને બોયફ્રેન્ડને રૂમ પર આવવાની ના પાડી દેતા મામલો થાળે પડ્યો હતો.

મીડિયા રિપોર્ટ અનુસાર બહારગામથી વડોદરા સેટલ થવા આવેલી હિના (નામ બદલ્યું છે) નામની યુવતી પિત્ઝા રેસ્ટોરાંમાં નોકરી કરતી હતી. જેથી તેણે રહેવા માટે રૂમ શોધતા શહેરના ગૌત્રી વિસ્તારમાં આવેલા એક મકાનમાં પેઈંગ ગેસ્ટ તરીકે રહેવા માટે સંપર્ક કરતા રૂમનો બંદોબસ્ત થઈ ગયો હતો. જો કે, રૂમમાં બીજી બે યુવતીઓ પણ રહેતી હોવાથી પરવડે તેવી જગ્યા મળી ગઈ હતી.

આ દરમિયાન થોડા સમય બાદ હિના એક યુવકના સંપર્કમાં આવી હતી. મિત્રતા થતાં નંબરની આપ-લે કરી હતી અને વાતચીત શરૂ થઈ હતી. થોડા સમયમાં જ ગાઢ મિત્રતા બનતા પ્રેમસંબંધ બંધાયો હતો. જેથી બોયફ્રેન્ડે હિનાના રૂમ પર આવવાનું ચાલુ કર્યું હતું, જ્યાં એક રૂમમાં પહેલેથી જ બે યુવતીઓ પણ રહેતી હતી. બોયફ્રેન્ડ મોડીરાતે આવતો અને કલાકો સુધી ત્યાં જ બેસી રહેતા બંને યુવતીઓ વાંધો ઉઠાવ્યો હતો અને રૂમની બહાર સંબંધ રાખવા કહ્યું હતું.

જેથી હિનાએ ઉપરાણું લઈ તેના બોયફ્રેન્ડ બંને યુવતીઓ સાથે ઉગ્ર બોલાચાલી કરી ધાકધમકી આફતા બંને યુવતીઓએ 181 મહિલા અભયમને કોલ કરીને સમગ્ર હકીકત જણાવતા ટીમ ઘટનાસ્થળે પહોંચી હતી. ટીમે હિનાને સમજાવી હતી કે, તેના બોયફ્રેન્ડ સામે કેસ થઈ શકે છે. અભયમની ટીમે કાઉન્સેલિંગ કરતા હિનાને પોતાની ભૂલ સમજાઈ હતી અને તેણીએ બંને યુવતીઓની માફી માંગી હતી.