છોટાઉદેપુરમાં શિક્ષકે કરી આચાર્યની હત્યા, આરોપીના 9 ડિસેમ્બરના રોજ લગ્ન હતા

નસવાડી: છોટાઉદેપુર જિલ્લાના નસવાડીમાં શિક્ષકે આચાર્યની હત્યા કરી હોવાની ઘટના સામે આવી છે. મળતી માહિતી પ્રમાણે, શિક્ષકે આચાર્યના ગળા, છાતી અને માથાના ભાગે છરીના ઘા મારીને હત્યા કરી હોવાનું સામે આવ્યું છે. એટલું જ નહીં, શિક્ષકે આચાર્યની પત્ની અને દીકરી ઉપર પણ હુમલો કર્યો હતો. જેમાં બંને ઈજાગ્રસ્ત થતાં સારવાર માટે હોસ્પિટલ ખસેડવામાં આવ્યા છે. આરોપી શિક્ષકના 9 ડિસેમ્બર 2020ના રોજ લગ્ન થવાના હતા. બનાવની જાણ થતાં નસવાડી પોલીસ ઘટનાસ્થળે પહોંચીને વધુ તપાસ હાથ ધરી છે.

હુમલો કરીને શિક્ષક ફરાર થઈ ગયો
મીડિયા રિપોર્ટ મુજબ નસવાડીમાં રામદેવનગર સોસાયટીમાં લિંડા મોડલ સ્કૂલના આચાર્ય મેરામણ પીઠિયા અને કોલંબા પ્રાથમિક શાળાના શિક્ષક ભરત પીઠિયા સામસામે જ રહેતા હતા. શિક્ષક ભરત પીઠિયા શુક્રવાર સવારે મેરામણના ઘરમાં ઘૂસી આવ્યો હતો અને છરા વડે મેરામણ પર તૂટી પડ્યો હતો અને તેમની હત્યા કરી નાખી હતી. આ ઉપરાંત ભરત પીઠીયાએ મેરામણની પત્ની અને દીકરી ઉપર પર જીવલેણ હુમલો કર્યો હતો. આ બાદ તે ત્યાંથી ફરાર થઈ ગયો હતો.

આરોપીના 9 ડિસેમ્બર લગ્ન થવાના હતા
મૃતક આચાર્ય મેરામણ પીઠીયા અને હત્યા કરી ફરાર આરોપી ભરત પીઠીયા વચ્ચે કૌટુંબિક સંબંધો હોવાનું મીડિયા રિપોર્ટના આધારે જાણવા મળ્યું છે. જો કે, શિક્ષકે આચાર્યની હત્યા કેમ કરી તેનું પાછળનું કારણ હજી અકબંધ છે. પોલીસ તપાસ દરમિયાન સામે આવેલી કંકોત્રી મુજબ આરોપી શિક્ષક ભરત પીઠીયાના આગામી 9 ડિસેમ્બરે લગ્ન પણ થવાના હતા. પોલીસ હત્યા કરીને ફરાર થયેલા ભરત સામે ગુનો નોંધીને શોધખોળ હાથ ધરી છે.

હુમલામાં આચાર્યની પત્ની-દીકરી ઘાયલ
આજે સવારે ભરત છરો લઈને મેરામણના ઘરેમાં ઘૂસી આવ્યો હતો અને તેમના ગળા, છાતી અને માથાના ભાગે ઘા ઝીંક્યા હતા. ત્યારબાદ તેણે મેરામણના પત્ની અને દીકરી ઉપર પણ હુમલો કર્યો હતો. જેમાં બંને ઈજાગ્રસ્ત થયા હતા. મૃતક આચાર્યની પત્નીના જણાવ્યા મુજબ તે ઘરમાં કામ કરતા હતા ત્યારે ભરત છરો લઈને આવ્યો અને પતિ પર હુમલો કરી દીધો હતો. જેમાં પતિનું ગંભીર ઈજાઓના કારણે મોત થયું છે જ્યારે પત્ની અને પુત્રીને ઈજાઓ પહોંચી છે. ઘટનાની તસવીરો પણ સામે આવી છે, જેમાં હત્યામાં વપરાયેલો છરો અને ઘરમાં લોહીના ડાઘા જોવા મળી રહ્યા છે.