વડોદરા- મધ્યપ્રદેશ પોલીસ દ્વારા દાહોદની એક પરીણિત મહિલા અને તેના પ્રેમીની ધરપકડ કરવામાં આવી છે. આ બન્ને પર આરોપ છે કે તેમણે મળીને મહિલાના પતિની હત્યા કરી છે. ઉલ્લેખનીય છે કે ચાર જ મહિના પહેલા આરતી પંચાલના લગ્ન લકી પંચાલ સાથે થયા હતા. આરતી પંચાલ પર પતિની હત્યાની યોજના ઘડવાનો આરોપ છે. પોલીસના જણાવ્યા અનુસાર, હત્યા કરનારા 3 લોકોને શોધવાની કામગીરી વિભાગના કર્મચારીઓ દ્વારા હાથ ધરવામાં આવી હતી.
આરતી અને રોહિતે મળીને લકી પંચાલની હત્યા કરવાનું નક્કી કર્યું જેથી તે બન્ને સાથે રહી શકે. રોહિત રાજપુરે ત્યારપછી બચુ ભૂરિયા, પપ્પુ સાંગડિયા અને રણજીત નિનામાનો સંપર્ક કર્યો અને તેમને આ ગુનાહિત કૃત્ય કરવા માટે 30,000 રુપિયા આપ્યા. આરતી દાહોદમાં હતી અને તેના પતિ લકી પંચાલે 31મી મેના રોજ તેને મળવા માટે દાહોદ આવવાનો નિર્ણય કર્યો. તેણે પછીથી યોજના બદલી કાઢી અને 4 જૂનના રોજ આરતીને મળવા મોટરબાઈક લઈને આવ્યો હતો.
આરતી લોકેશન જાણવા માટે પતિને સતત ફોન કરતી રહેતી હતી. તે આ માહિતી કોન્ટ્રાક્ટ કિલર્સને આપતી રહેતી હતી. તેમણે આરતીના પતિનું અપહરણ કર્યું અને પછી તેનું ગળુ દબાવીને હત્યા કરી નાખી. લકી પંચાલના મૃતદેહને નજીકના એક જંગલમાં મૂકી દેવામાં આવ્યો. જ્યારે લકી પંચાલની કોઈ ખબર ના મળી તો તેના પરિવારે પોલીસનો સંપર્ક કર્યો. પોલીસે મોબાઈલ ફોન ટ્રેક કર્યો. બીજા દિવસે લકીનો મૃતદેહ મળી આવ્યો અને હત્યાની ફરિયાદ નોંધવામાં આવી છે.