પોલીસ સ્ટેશન નજીક જ પાડોશી મહિલાએ યુવતીને ચપ્પુના ઘા ઝીંકીને હત્યા કરી

વડોદરાઃ શહેરના કારેલીબાગ વિસ્તારમાં શુક્રવારે એક પરિણીત મહિલાની તેના પાડોશી દ્વારા હત્યા કરવામાં આવી હતી. સબીના તરીકે ઓળખાતી આરોપીની નિહાઝ બાનો સાથે મણિયાર મોહલ્લામાં નજીવા કારણોસર ઝઘડો થયો હતો. ટૂંક સમયમાં ઝઘડાએ ઉગ્ર સ્વરૂપ ધારણ કરી લેતા સબીના ઉશ્કેરાઈને તેના ઘરેથી છરી લઈને આવી નિહાઝની છાતીમાં ઘા માર્યા હતા. જેથી નિહાઝ ત્યાં જ લોહીલુહાણ હાલતમાં ઢળી પડી હતી.

નિહાઝને હોસ્પિટલ ખસેડાઈ પણ તે બચી શકી નહીં
બનાવની જાણ થતાં પરિવારના અને આસપાસના લોકો નિહાઝને તાત્કાલિક હોસ્પિટલ લઈ ગયા હતા પરંતુ તે બચી શકી નહીં. પોલીસે હત્યા બાદ ફરાર સબીનાની શોધખોળ શરૂ કરી છે. લડાઈ પાછળનું કારણ અને ગુનામાં અન્ય કોઈ વ્યક્તિ સંડોવાયેલી છે કે કેમ તે અંગે તપાસ ચાલી રહી છે.

સામાન્ય બોલાચાલીએ ઉગ્ર સ્વરૂપ ધારણ કરતા હત્યા
પોલીસ સૂત્રો પાસેથી પ્રાપ્ત માહિતી અનુસાર વડોદરાના કારેલીબાગ પોલીસ સ્ટેશન સામે આવેલા મણિયાર મહોલ્લામાં મોડી સાંજે બનાવ બન્યો હતો. નિહાઝ નામની પરિણીતા શુક્રવારે રાજપારડી તેની સાસરીમાંથી વડોદરા મહિલા પોલીસ સ્ટેશન સામે આવેલા મણિયાર મહોલ્લામાં તેના ઘરે પિયરમાં આવી હતી. તે સમયે પાડોશમાં રહેલી સબીના જોડે નિહાઝની બોલાચાલી થતાં વાત એટલી વણસી ગઈ કે, ઝઘડો ઉગ્ર બની ગયો.

ખૂની ખેલ પાછળ પારિવારિક મામલો જવાબદાર હોઈ શકેસબીનાએ નિહાઝને છાતી અને પીઠમાં ચપ્પુ મારતા નિહાઝને હોસ્પિટલ ખસેડાઈ હતી, જ્યાં તેનું ટૂંકી સારવાર દરમિયાન મોત થયું હતું. સબીનાના તથા નિહાઝ વચ્ચે પારિવારિક મામલો આ ખૂની ખેલ પાછળ જવાબદાર હોવાનું માનવામાં આવી રહ્યું છે. સમગ્ર મામલે સ્થાનિક પોલીસે વધુ તપાસ હાથ ધરી છે.