ઝાલોદના કાઉન્સિલર હિરેન પટેલની હત્યામાં સંડોવાયેલો ઈમરાન ગુડાલા હરિયાણાથી પકડાયો

દાહોદ જિલ્લાના ઝાલોદના ભાજપના આગેવાન તથા કાઉન્સિલર હિરેન પટેલની હત્યાના કેસમાં પાંચ આરોપીઓની ધરપકડ બાદ આ કેસ રાજકીય હત્યાનો હોવાનો ઘટસ્ફોટ થયો છે. ત્યારે ગુજરાત એન્ટિ ટેરરિસ્ટ સ્ક્વોડે હત્યામાં સંડોવાયેલા વધુ એક આરોપી ઈમરાન ઉર્ફે ઈમુ ગુડાલાને હરિયાણામાંથી ઝડપી લીધો છે. આ હત્યામાં કોંગ્રેસના ધારાસભ્ય ભાવેશ કટરાના ભાઈન ઈશારે કરવામાં આવી હોવાનો ATSએ દાવો કર્યો છે.

ઘટનાની વિગતો મુજબ, ત્રણ મહિના પહેલા અજાણ્યા વાહનની ટક્કરે ઝાલોદના કાઉન્સિલર હિરેન પટેલની હત્યા થઈ હતી. આ કેસમાં ATSએ ગોધરાકાંડના આરોપી ઈરફાન પાડા ઉપરાંત મધ્ય પ્રદેશના મોહંમદ સમીર, ઝાલોદના અજય કલાક, સજ્જનસિંગ ઉર્ફે કરણ ચૌહાણ, સલીમ ઉર્ફે કાળાભાઈ શેખની ધરપકડ બાદ હરિયાણાથી ઈમરાન ગુડાલાની ધરપકડ કરી છે. ATSના દાવા મુજબ, હિરેન પટેલની હત્યા રાજકીય છે અને ઝાલોદના કોંગ્રેસના ધારાસભ્ય ભાવેશ કટારાના ભાઈ અમિત કટારાના ઈશારે તેને અંજામ અપાયો છે.

સૂત્રો મુજબ, અમિત કટારાએ ઈમરાન સાથે મળીને હત્યાની આ ઘટનાનું ષડયંત્ર રચીને તેને અંજામ આપ્યો હતો. આ હત્યા પાછળ ઝાલોદ નગરપાલિકામાં આચરવામાં આવતા કૌભાંડો હોવાની શંકા સેવાઈ રહી છે. આ હત્યામાં રાજકીય નેતા કે આગેવાનની સંડોવણી છે કે કેમ તે અંગે હાલમાં ATS દ્વારા તપાસ હાથ ધરવામાં આવી છે.

પોલીસ મુજબ, હત્યાનો સૂત્રધાર ઈરફાન સીરાજ પાડાએ મૃતક હિરેન પટેલની હત્યા કરવા માટે અજય કલાલ પાસેથી સોપારી લીધી હતી. ઈરફાન પાડાએ તેના એમ.પી ઉજ્જૈનના મહેમદપુર ગામના સાગરીતોનો સંપર્ક કરીને હત્યાનું કાવતરું રચીને તેને 4 લાખ આપવાનું નક્કી કર્યું હતું. બનાવના દિવસે આરોપીઓએ મૃતકના ઘરની તેમજ મોર્નિંગ વોક પર નીકળતા રોડની બોલેરો ગાડીમાં બેસીને રેકી કરી હતી તથા હિરેનભાઈના ફોટા બતાવી ઓળખ નિશ્ચિત કરી હતી. હિરેનભાઈ નજરે પડતા જ ઈરફાન પાડાએ તેઓને દૂરથી બતાવીને હત્યા કરાવી નાખી હતી.

ઉલ્લેખનીય છે કે હાલમાં જ ગૃહ રાજ્યમંત્રી પ્રદિપસિંહ જાડેજાએ મૃતક હિરેન પટેલના પરિવારજનોને મળ્યા હતા અને આરોપીઓ વિરુદ્ધ કડક કાર્યવાહી કરવાનું આશ્વાસન આપ્યું હતું.

કેમ કરાવી હત્યા? ઝાલોદ નગરપાલિકા પર ભાજપી સત્તા હતી. અમિત કટારાની પત્ની કિંજલ કટારા પાલિકાની પ્રમુખ હતી. જ્યારે સોનલ ડીંડોર ઉપપ્રમુખ હતા. પાલિકાનું રાજકીય પક્ષોના સંખ્યાબળ મુજબ, કોંગ્રેસના 14, ભાજપના 8 તથા અપક્ષ 6 સભ્યો હતા. આ માહોલમાં હિરેન પટેલે કોંગ્રેસના ચાર સભ્યો અને 3 અપક્ષ સભ્યોને તોડીને નગરપાલિકા પર ભગવો લહેરાવ્યો હતો. કોંગ્રેસ પાસેથી સત્તા આંચકી લેવામાં હિરેન પટેલની મહત્વપૂર્ણ ભૂમિકા હતી, જેના પગલે અમિત કટારા તેનાતી છંછેડાયેલો હતો.